قازاقستان مەن رەسەي شەكاراسىنا شوعىرلانىپ قالعان ٶزبەكستان ازاماتتارىنا شەكارادان ٶتۋگە رۇقسات بەرٸلدٸ. بۇل جٶنٸندە ٶزبەكستاننىڭ تاتارستانداعى باس كونسۋلى فاريددين ناسريەۆ Kun.uz ينتەرنەت باسىلىمىنا بەرگەن سۇقباتىندا ايتتى, دەپ جازادى ازاتتىق.
- ٶز ازاماتتارىمىزدى الىپ كەتۋگە اۆتوبۋس ەزٸرلەپ جاتىرمىز. قازاقستاننىڭ ٶزبەكستانداعى ەلشٸلٸگٸ دە ٶزبەكستانعا جەتكٸزەتٸن كٶلٸك بٶلەتٸن بولدى, – دەدٸ ناسريەۆ.
باس كونسۋلدىڭ سٶزٸنشە, ٶزبەكستان ٷكٸمەتٸ قازاقستان, رەسەي ٷكٸمەتتەرٸمەن كەلٸسسٶز جاساپ, ٶزبەكستان ازاماتتارىن شەكارادان ٶتكٸزٸپ الۋعا ۋاعدالاسقان.
"كەلٸسسٶز وڭاي بولمادى. بٸراق بۇل - ەرتەڭ ٶزگەلەر دە وسىلاي ٶتە بەرەدٸ دەگەن سٶز ەمەس. ٶزبەكستان ازاماتتارى تۇراقتى تٸركەلگەن جەرلەرٸنەن قوزعالماي تۇرا تۇرعانى دۇرىس. كەزەگٸ كەلگەندە چارتەر رەيستەرگە تٸركەلٸپ, ٶزبەكستانعا كەلۋگە بولادى. كوروناۆيرۋس ٸندەتٸ اياقتالعان سوڭ بەرٸ دە وتانىمىزعا ەمٸن-ەركٸن ورالا الادى", – دەدٸ ٶزبەكستاننىڭ تاتارستانداعى باس كونسۋلى فاريددين ناسريەۆ.
ٶتكەن اپتادا ٶزبەكستاننىڭ جٷزدەگەن ەڭبەك ميگرانتى رەسەيدٸڭ ورىنبور وبلىسىنىڭ قازاقستانمەن شەكاراسىنداعى باقىلاۋ-ٶتكٸزۋ پۋنكتٸنە جينالىپ قالعان. ولار ٶزبەكستانعا ٶتٸپ كەتۋ ٷشٸن قازاقستاننان ترانزيت دەلٸز اشۋدى سۇراعان ەدٸ. كەيبٸرٸنٸڭ قازاقستان - رەسەي شەكاراسىندا جاتقانىنا ون كٷننەن اسقان.
ازاتتىق راديوسىنىڭ ٶزبەك رەداكتسيياسى ميگرانتتار قازاقستان - رەسەي شەكاراسىنىڭ ٶزگە باقىلاۋ-ٶتكٸزۋ پۋنكتتەرٸنە دە جينالا باستاعانىن حابارلادى. رەسەيدٸڭ تٷرلٸ ٶڭٸرٸنە جۇمىس ٸزدەپ بارعان ٶزبەكستان ازاماتتارى كوروناۆيرۋسكە بايلانىستى كارانتين شارالارىنان كەيٸن كٷنكٶرٸسسٸز قالىپ, ٶزبەكستانعا ورالا باستاعان.
