Qazaqstan men Resei shekarasyna shoǵyrlanyp qalǵan Ózbekstan azamattaryna shekaradan ótýge ruqsat berildi. Bul jóninde Ózbekstannyń Tatarstandaǵy bas konsýly Fariddin Nasriev Kun.uz internet basylymyna bergen suqbatynda aitty, dep jazady Azattyq.
- Óz azamattarymyzdy alyp ketýge avtobýs ázirlep jatyrmyz. Qazaqstannyń Ózbekstandaǵy elshiligi de Ózbekstanǵa jetkizetin kólik bóletin boldy, – dedi Nasriev.
Bas konsýldyń sózinshe, Ózbekstan úkimeti Qazaqstan, Resei úkimetterimen kelissóz jasap, Ózbekstan azamattaryn shekaradan ótkizip alýǵa ýaǵdalasqan.
"Kelissóz ońai bolmady. Biraq bul - erteń ózgeler de osylai óte beredi degen sóz emes. Ózbekstan azamattary turaqty tirkelgen jerlerinen qozǵalmai tura turǵany durys. Kezegi kelgende charter reisterge tirkelip, Ózbekstanǵa kelýge bolady. Koronavirýs indeti aiaqtalǵan soń bári de Otanymyzǵa emin-erkin orala alady", – dedi Ózbekstannyń Tatarstandaǵy bas konsýly Fariddin Nasriev.
Ótken aptada Ózbekstannyń júzdegen eńbek migranty Reseidiń Orynbor oblysynyń Qazaqstanmen shekarasyndaǵy baqylaý-ótkizý pýnktine jinalyp qalǵan. Olar Ózbekstanǵa ótip ketý úshin Qazaqstannan tranzit dáliz ashýdy suraǵan edi. Keibiriniń Qazaqstan - Resei shekarasynda jatqanyna on kúnnen asqan.
Azattyq radiosynyń Ózbek redaktsiiasy migranttar Qazaqstan - Resei shekarasynyń ózge baqylaý-ótkizý pýnktterine de jinala bastaǵanyn habarlady. Reseidiń túrli óńirine jumys izdep barǵan Ózbekstan azamattary koronavirýske bailanysty karantin sharalarynan keiin kúnkórissiz qalyp, Ózbekstanǵa orala bastaǵan.
