فۋتبولدان قازاقستان ۇلتتىق قۇراماسى تاشكەنتتە ٶتكەن جولداستىق كەزدەسۋدە ٶزبەكستان فۋتبولشىلارىنا ەسە جٸبەردٸ, دەپ حابارلايدى "ۇلت اقپارات".
"پاحتاكور" ستاديونىندا ٶتكەن ماتچ 2:0 ەسەبٸمەن الاڭ قوجايىندارىنىڭ پايداسىنا اياقتالدى. ٶزبەكتەر ويىنداعى قوس گولدى دا بٸرٸنشٸ تايمدا سوقتى.
12-مينۋتتا حودجيمات ەركينوۆ ەسەپ اشسا, 45-مينۋتتا يتالييالىق "رومادا" دوپ تەبەتٸن ەلدور شومۋرودوۆ قاقپاشىدان ايلاسىن اسىردى.
وسىلايشا, قازاقستان قۇراماسى قاتارىنان ەكٸنشٸ ويىندا جەڭٸلٸس تاپتى. بۇعان دەيٸن ماگومەد اديەۆ شەكٸرتتەرٸ ۇلتتار ليگاسىندا ەزٸربايجان قۇراماسىنان 0:3 ەسەبٸمەن ۇتىلعان بولاتىن.
ايتا كەتەيٸك, بۇل كەزدەسۋ بارىسىندا ەكٸ جىلدىق ٷزٸلٸستەن كەيٸن باۋىرجان يسلامحان الاڭعا شىقتى. ول ەكٸنشٸ تايمدا قوسىلىپ, كاپيتان مٸندەتٸن دە اتقارىپ شىقتى.
ەسكە سالايىق, قازاقستان قۇراماسى كەلەسٸ كەزدەسۋٸن 19 قاراشا كٷنٸ ٶتكٸزەدٸ. بۇل كٷنٸ بٸزدٸڭ جٸگٸتتەر ابۋ-دابي قالاسىندا باە كومانداسىنا قارسى وينايدى.
