فوتو ©️ Tengrinews.kz / تۋرار كازانگاپوۆ
اقتاۋ ەۋەجايى ۇشاقتىڭ قونۋىنا دايىن بولدى, ال ديسپەتچەر ەۋە كەمەسٸنٸڭ قاۋٸپسٸز قونۋىن قامتاماسىز ەتۋ ٷشٸن بارلىق قاجەتتٸ شارانى جەدەل تٷردە قابىلدادى. بۇل تۋرالى بريفينگتە كٶلٸك مينيسترٸ مارات قاراباەۆ حابارلادى, - دەپ حابارلايدى Ult.kz Tengritravel.kz-كە سٸلتەمە جاساپ.
جۋرناليستەردٸڭ سۇراقتارىنا جاۋاپ بەرە وتىرىپ, قاراباەۆ ەۋەجايدىڭ اپاتتىق قىزمەتتەرٸ ۇشاقتى قابىلداۋعا دايىن بولعانىن ايتتى.
"ەكيپاج قازاقستاننىڭ ەۋە كەڭٸستٸگٸنە كٸرگەننەن كەيٸن اقتاۋ ەۋەجايى ديسپەتچەرلٸك قىزمەتٸمەن بايلانىس ورناتتى. ديسپەتچەر ەۋە كەمەسٸنٸڭ اەرودرومعا قاۋٸپسٸز قونۋىن قامتاماسىز ەتۋ ٷشٸن بارلىق قاجەتتٸ شارالاردى جەدەل تٷردە قابىلدادى.
ودان بٶلەك, قونۋ الاڭىمەن ۆيزۋالدى بايلانىستى جەڭٸلدەتۋ ٷشٸن ۇشۋ-قونۋ جولاعىنىڭ جارىقتارى قوسىلدى. ەكيپاج اقتاۋ ەۋەجايىنىڭ ۇشۋ-قونۋ جولاعىنا ەكٸ رەت قونۋعا تىرىستى, بۇل كەزدە ۇشاقتىڭ بيٸكتەگٸ قوزعالىسىندا ٶزگەرٸستەر بايقالدى. سودان كەيٸن ەۋە كەمەسٸ جاعالاۋعا قاراي باعىت الدى. ساعات 11:28-دە ەكيپاجبەن بايلانىس ٷزٸلٸپ, ودان كەيٸن ەۋە كەمەسٸ قۇلادى", - دەپ تٷسٸندٸردٸ مينيستر.
ەۋە كەمەسٸنٸڭ قۇلاعان ورنىنا العاشقىلاردىڭ بٸرٸ بولىپ اقتاۋ ەۋەجايىنىڭ قۇتقارۋ قىزمەتتەرٸ مەن ٶڭٸردٸڭ تجد ٶكٸلدەرٸ جەتٸپ, جەدەل تٷردە جولاۋشىلاردى ەۆاكۋاتسييالاۋعا كٸرٸستٸ, دەپ قوستى قاراباەۆ.
"بٷگٸندە ارنايى كوميسسييانىڭ تەرگەۋٸ جٷرگٸزٸلٸپ جاتىر, ونىڭ قۇرامىنا قازاقستان رەسپۋبليكاسى كٶلٸك مينيسترلٸگٸنٸڭ كٶلٸك وقيعالارى مەن ينتسيدەنتتەرٸن تەرگەۋ دەپارتامەنتٸنٸڭ ماماندارى كٸردٸ", - دەدٸ مارات قاراباەۆ.
سونداي-اق بريفينگٸدە اقتاۋدا اپاتقا ۇشىراعان Embraer 190 ۇشاعىنىڭ بورتىندا بولعان بارلىق قازاقستاندىقتىڭ قازا تاپقانى ايتىلدى.
ەسكە سالايىق, 25 جەلتوقساندا جەرگٸلٸكتٸ ۋاقىت بويىنشا ساعات 11:30-دا باكۋدەن (ەزەربايجان) گروزنىيعا (رەسەي) ۇشقان Azerbaijan Airlines ۇشاعى اقتاۋدان ٷش شاقىرىم جەردە اپاتقا ۇشىرادى. جولاۋشىلار ۇشاعى قالىڭ تۇمان سالدارىنان گروزنىيعا قونا الماي, ەۋەلٸ ماحاچكالاعا, كەيٸن اقتاۋعا باعىتتالعان.
