Foto ©️ Tengrinews.kz / Týrar Kazangapov
Aqtaý áýejaiy ushaqtyń qonýyna daiyn boldy, al dispetcher áýe kemesiniń qaýipsiz qonýyn qamtamasyz etý úshin barlyq qajetti sharany jedel túrde qabyldady. Bul týraly brifingte kólik ministri Marat Qarabaev habarlady, - dep habarlaidy Ult.kz Tengritravel.kz-ke silteme jasap.
Jýrnalisterdiń suraqtaryna jaýap bere otyryp, Qarabaev áýejaidyń apattyq qyzmetteri ushaqty qabyldaýǵa daiyn bolǵanyn aitty.
"Ekipaj Qazaqstannyń áýe keńistigine kirgennen keiin Aqtaý áýejaiy dispetcherlik qyzmetimen bailanys ornatty. Dispetcher áýe kemesiniń aerodromǵa qaýipsiz qonýyn qamtamasyz etý úshin barlyq qajetti sharalardy jedel túrde qabyldady.
Odan bólek, qoný alańymen vizýaldy bailanysty jeńildetý úshin ushý-qoný jolaǵynyń jaryqtary qosyldy. Ekipaj Aqtaý áýejaiynyń ushý-qoný jolaǵyna eki ret qonýǵa tyrysty, bul kezde ushaqtyń biiktegi qozǵalysynda ózgerister baiqaldy. Sodan keiin áýe kemesi jaǵalaýǵa qarai baǵyt aldy. Saǵat 11:28-de ekipajben bailanys úzilip, odan keiin áýe kemesi qulady", - dep túsindirdi ministr.
Áýe kemesiniń qulaǵan ornyna alǵashqylardyń biri bolyp Aqtaý áýejaiynyń qutqarý qyzmetteri men óńirdiń TJD ókilderi jetip, jedel túrde jolaýshylardy evakýatsiialaýǵa kiristi, dep qosty Qarabaev.
"Búginde arnaiy komissiianyń tergeýi júrgizilip jatyr, onyń quramyna Qazaqstan Respýblikasy Kólik ministrliginiń Kólik oqiǵalary men intsidentterin tergeý departamentiniń mamandary kirdi", - dedi Marat Qarabaev.
Sondai-aq brifingide Aqtaýda apatqa ushyraǵan Embraer 190 ushaǵynyń bortynda bolǵan barlyq qazaqstandyqtyń qaza tapqany aityldy.
Eske salaiyq, 25 jeltoqsanda jergilikti ýaqyt boiynsha saǵat 11:30-da Bakýden (Ázerbaijan) Groznyiǵa (Resei) ushqan Azerbaijan Airlines ushaǵy Aqtaýdan úsh shaqyrym jerde apatqa ushyrady. Jolaýshylar ushaǵy qalyń tuman saldarynan Groznyiǵa qona almai, áýeli Mahachkalaǵa, keiin Aqtaýǵa baǵyttalǵan.
