الماتىدا كەسٸپكەر الماس ەبدٸعاپپاروۆ سوتتالدى, - دەپ حابارلايدى Tengrinews.kz اگەنتتٸگٸ.
مەدەۋ اۋدانى №2 اۋداندىق سوتىنىڭ باسپاسٶز قىزمەتٸ ٶكٸلٸ Parmigiano Group يەسٸ الماس ەبدٸعاپپاروۆقا ٷكٸم شىققانىن راستادى. سوت ٷكٸمٸمەن ەبدٸعاپپاروۆ ٶزٸنە سەنٸپ تاپسىرىلعان اسا ٸرٸ مٶلشەردەگٸ مٷلٸكتٸ جىمقىرعانى ٷشٸن كٸنەلٸ دەپ تانىلىپ, وعان بەس جىل مەرزٸمگە قارجى ۇيىمدارىندا باسشىلىق لاۋازىمداردى اتقارۋ قۇقىعىنان ايىرا وتىرىپ, جەتٸ جىل باس بوستاندىعىنان ايىرۋ جازاسى تاعايىندالدى.
"سوت 2021 جىلعى ناۋرىزدا ا.ەبدٸعاپپاروۆتى Esentai City تۇرعىن ٷي كەشەنٸندە ورنالاسقان پەتەرلەر مەن تۇرعىن ٷيلەردٸ (ۆيللالاردى) سالۋ, ساتۋمەن اينالىساتىن AV-Construction جشس ديرەكتورىنىڭ كوممەرتسييالىق مەسەلەلەر جٶنٸندەگٸ ورىنباسارى بولا تۇرا ەرٸ سەرٸكتەستٸكتٸڭ ماتەريالدىق جاۋاپتى جەنە ۋەكٸلەتتٸ تۇلعاسى رەتٸندە كليەنتپەن Esentai City تۇرعىن ٷي كەشەنٸندە ورنالاسقان جەر ۋچاسكەسٸ بار تۇرعىن ٷي (ۆيللا) تٷرٸندەگٸ جىلجىمايتىن مٷلٸكتٸ ساتىپ الۋ ٷشٸن الدىن الا ساتۋ-ساتىپ الۋ شارتىن جاساعان.
ودان ەرٸ وسى كەلٸسٸم بويىنشا ساتىپ الۋشىنىڭ ٶكٸلٸ ەبدٸعاپپاروۆقا تۇرعىن ٷي (ۆيللا) ساتىپ الۋ ٷشٸن ەكٸ ميلليون دوللار كٶلەمٸندەگٸ سومانىڭ بٸر بٶلٸگٸن اۋدارعان. ال ول بٸر ميلليون دوللارىن عانا كومپانييا باسشىلىعىنا اۋدارىپ, اقشانىڭ قالعان بٶلٸگٸن زاڭسىز يەمدەنگەن", - دەدٸ سوتتىڭ باسپاسٶز قىزمەتٸ ٶكٸلٸ.
