رەسەيلٸك دەپۋتات سەرگەي ميرونوۆ كالينينگراد قالاسىن پرەزيدەنت ۆلاديمير پۋتيننٸڭ قۇرمەتٸنە ۆلاديبالتييسك دەپ اتاۋدى ۇسىندى. مەملەكەتتٸك دۋماداعى «سپراۆەدليۆايا روسسييا – زا پراۆدۋ» فراكتسيياسىنىڭ جەتەكشٸسٸ مۇنداي باستامانى ٶزٸنٸڭ Telegram-كانالىندا كٶتەردٸ, دەپ حابارلايدى Ulysmedia.kz.
"مەن كالينينگرادتىڭ اتىن ٶزگەرتٸپ, وبلىستىڭ مەرتەبەسٸن كٶتەرۋدٸ ۇسىنامىن. 76 جىل بۇرىن, 1946 جىلى 4 شٸلدە كٷنٸ كەنيگسبەرگ وبلىسى كالينينگراد بولىپ ٶزگەرگەن ەدٸ. سول جىلى شىعىس پرۋسسييانىڭ استاناسىن بالتييسك قالاسىنا ٶزگەرتۋ ۇسىنىلعان بولاتىن. سلاۆگورود نەمەسە كورولەۆەتس دەپ ٶزگەرتۋ تۋرالى نۇسقالار دا بولعان. بٸراق ميحايل كالينين قايتىس بولىپ, قالانىڭ اتى سونىڭ قۇرمەتٸنە اتالاتىن بولدى. ال پيللاۋ دەگەن قالاشىق بالتييسك اتاندى", - دەدٸ ميرونوۆ.
دەپۋتات رەسەيدٸڭ ستراتەگييالىق ٶڭٸرٸنٸڭ بٸرٸ سانالاتىن كالينينگراد قالاسىنىڭ مەرتەبەسٸن كٶتەرۋ ٷشٸن ونى ۆلاديبالتييسك دەپ ٶزگەرتۋ كەرەك دەگەن پٸكٸردە.
"مىسالى, قالانى ۆلاديبالتييسك دەپ اتاساق قانداي كەرەمەت! ۆلاديبالتييسك بالتىق جاعالاۋى ٶڭٸرٸنٸڭ استاناسى دەسەك تاماشا ەمەس پە?! مەنٸڭشە, قالانىڭ اتىن اۋىستىرساق بالتىق تەڭٸزٸ مەن تىنىق مۇحيتىنىڭ اراسىن الىپ جاتقان كەڭ بايتاق جەرٸمٸز ٷشٸن جاقسى بولار ەدٸ. ەرينە, ونى قالا تۇرعىندارى شەشۋٸ كەرەك. مەنٸكٸ ۇسىنىس", - دەدٸ ول.
الايدا كوممۋنيستەر ميرونوۆتىڭ بۇل باستاماسىنا قارسى.
"بٸزگە ەشقانداي ۆلاديبالتييسك كەرەك ەمەس. بٸزگە كەڭەستٸك كالينينگراد قانا كەرەك. ەگەر ميرونوۆ بٸر نەرسەنٸ ٶزگەرتكٸسٸ كەلسە, ٶزٸنٸڭ ساياجايىنىڭ اتىن ٶزگەرتسٸن!", - دەدٸ «رەسەي كوممۋنيستەرٸ» پارتيياسىنىڭ جەتەكشٸسٸ سەرگەي مالينكوۆيچ.
