"تاليبان" سودىرلارى راكەتا شابۋىلىنان بٷلٸنگەن كٶلٸكتٸڭ جانىندا تۇر. كابۋل, 30 تامىز 2021 جىل.
"يسلام مەملەكەتٸ" تەرروريستٸك ۇيىمى كابۋل ەۋەجايىنا جاسالعان راكەتا شابۋىلىن موينىنا الدى. 30 تامىزدا اقش ەسكەريلەرٸ كابۋل ەۋەجايىنا اتىلعان كەمٸ بەس راكەتانى زىمىراننان قورعانۋ جٷيەسٸ اتىپ تٷسٸرگەنٸن حابارلاعان. سول كٷنٸ كەشكٸسٸن "يم" تەرروريستٸك توبى تەلەگرامداعى كانالىندا كابۋل اەروپورتىنا التى "كاتيۋشا" زىمىرانى اتىلعانىن ايتتى, دەپ حابارلايدى ازاتتىق راديوسى.
30 تامىزداعى زىمىران شابۋىلىنان قازا تاپقاندار مەن زارداپ شەككەندەر جايلى اقپارات جوق.
راكەتا اقش اۋعانستاندا قالعان ازاماتتارىن ەۆاكۋاتسييالاۋ وپەراتسيياسىنىڭ سوڭعى ساعاتتارىندا اتىلدى. اۋعانستاندا بيلٸكتٸ باسىپ العان "تاليبان" قوزعالىسىنىڭ (قازاقستان مەن بٸرقاتار ەلدە تەرروريستٸك ۇيىم دەپ تانىلعان) تالابىنا ساي, اقش 31 تامىزعا دەيٸن اۋعانستانداعى كٷشتەرٸن تٷگەل ەكەتۋٸ تيٸس.
26 تامىزدا كابۋل ەۋەجايىنىڭ ماڭىندا ەكٸ جويقىن جارىلىس بولىپ, 170-تەن اسا ادام قازا تاپقان. مەرت بولعانداردىڭ اراسىندا اقش ەسكەريلەرٸ دە بار. بۇل شابۋىلدى دا "يسلام مەملەكەتٸنٸڭ" حوراسان توبى موينىنا العان ەدٸ.
وسىدان كەيٸن امەريكا "يسلام مەملەكەتٸ" توبىنا ەكٸ رەت درون شابۋىلىن جاساپ, بٸرنەشە سودىردى ٶلتٸرگەنٸن حابارلاعان.
15 تامىزدا تەلٸپتەر كابۋلدى العان سوڭ اقش 117 مىڭنان استام شەتەلدٸك پەن اۋعاندى اۋعانستاننان ەكەتكەنٸن مەلٸمدەدٸ. رەسمي ۆاشينگتون كابۋل ەۋەجايىنداعى ەۆاكۋاتسيياعا "كٶپ كەدەرگٸ جاسالىپ جاتقانىن", بۇل وپەراتسييا اياقتالعانعا دەيٸن شابۋىل قاۋپٸ كٶپ ەكەنٸن ەسكەرتتٸ. اقش پرەزيدەنتٸ دجو بايدەن ەۆاكۋاتسييانىڭ سوڭعى ساعاتتارى "ٶتە قاۋٸپتٸ بولۋى مٷمكٸن" دەيدٸ.
30 تامىزداعى راكەتا شابۋىلىنان كەيٸن كابۋل تۇرعىندارى كٶشەلەر مەن ٷيلەرٸنٸڭ ماڭىنان زىمىران سىنىقتارىن كٶرگەنٸن ايتقان. كۋەگەرلەر Associated Press اگەنتتٸگٸنە كابۋل ەۋەجايىنىڭ ماڭىنداعى اۋداندارعا تٷسكەنٸن, كەيٸن اتىس بولعانىن جەتكٸزگەن.
29 تامىزدا اقش ەسكەريلەرٸ كابۋلدا درون شابۋىلىمەن "يسلام مەملەكەتٸ – حوراسان" توبىنا تيەسٸلٸ كٶلٸكتٸ جويعانىن, بۇل كٶلٸكپەن تەررورلىق شابۋىل جوسپارلانعانىن مەلٸمدەدٸ. ال "تاليبان" ٶكٸلدەرٸ بۇل شابۋىلدان قاراپايىم تۇرعىندار قازا بولعانىن ايتتى. Tolo news اگەنتتٸگٸن, ەۋە شابۋىلىنان سوڭ كەمٸ 10 تۇرعىن قازا تاپقانىن, مەرت بولعانداردىڭ اراسىندا بالالار دا بارىن حابارلادى.
اقش ەسكەريلەرٸ بۇل اقپاراتتى تەكسەرەتٸندەرٸن مەلٸمدەدٸ.
قازٸر تەلٸپتەر ەيەلدەردٸڭ بٸلٸم الۋىنا, جۇمىس ٸستەۋٸنە مٷمكٸندٸك بەرەتٸنٸن ايتادى, بٸراق ەيەلدەردٸڭ كيٸمٸ يسلام زاڭىنا ساي كەلۋ كەرەك دەپ تالاپ ەتەدٸ. الايدا اۋعان جۇرتى تەلٸپتەردٸڭ سٶزٸنە كٷمەنمەن قارايدى.
"تاليبان" ٶكٸلدەرٸنٸڭ اگەنتتٸكتەرگە ايتۋىنشا, تەلٸپتەر 31 تامىزدان سوڭ جينالىپ, اۋعانستاننىڭ بولاشاق ٷكٸمەتٸنٸڭ جاعدايىن تالقىلايدى.
