"Taliban" sodyrlary raketa shabýylynan búlingen kóliktiń janynda tur. Kabýl, 30 tamyz 2021 jyl.
"Islam memleketi" terroristik uiymy Kabýl áýejaiyna jasalǵan raketa shabýylyn moinyna aldy. 30 tamyzda AQSh áskerileri Kabýl áýejaiyna atylǵan kemi bes raketany zymyrannan qorǵaný júiesi atyp túsirgenin habarlaǵan. Sol kúni keshkisin "IM" terroristik toby Telegramdaǵy kanalynda Kabýl aeroportyna alty "Katiýsha" zymyrany atylǵanyn aitty, dep habarlaidy Azattyq radiosy.
30 tamyzdaǵy zymyran shabýylynan qaza tapqandar men zardap shekkender jaily aqparat joq.
Raketa AQSh Aýǵanstanda qalǵan azamattaryn evakýatsiialaý operatsiiasynyń sońǵy saǵattarynda atyldy. Aýǵanstanda bilikti basyp alǵan "Taliban" qozǵalysynyń (Qazaqstan men birqatar elde terroristik uiym dep tanylǵan) talabyna sai, AQSh 31 tamyzǵa deiin Aýǵanstandaǵy kúshterin túgel áketýi tiis.
26 tamyzda Kabýl áýejaiynyń mańynda eki joiqyn jarylys bolyp, 170-ten asa adam qaza tapqan. Mert bolǵandardyń arasynda AQSh áskerileri de bar. Bul shabýyldy da "Islam memleketiniń" Horasan toby moinyna alǵan edi.
Osydan keiin Amerika "Islam memleketi" tobyna eki ret dron shabýylyn jasap, birneshe sodyrdy óltirgenin habarlaǵan.
15 tamyzda tálipter Kabýldy alǵan soń AQSh 117 myńnan astam sheteldik pen aýǵandy Aýǵanstannan áketkenin málimdedi. Resmi Vashington Kabýl áýejaiyndaǵy evakýatsiiaǵa "kóp kedergi jasalyp jatqanyn", bul operatsiia aiaqtalǵanǵa deiin shabýyl qaýpi kóp ekenin eskertti. AQSh prezidenti Djo Baiden evakýatsiianyń sońǵy saǵattary "óte qaýipti bolýy múmkin" deidi.
30 tamyzdaǵy raketa shabýylynan keiin Kabýl turǵyndary kósheler men úileriniń mańynan zymyran synyqtaryn kórgenin aitqan. Kýágerler Associated Press agenttigine Kabýl áýejaiynyń mańyndaǵy aýdandarǵa túskenin, keiin atys bolǵanyn jetkizgen.
29 tamyzda AQSh áskerileri Kabýlda dron shabýylymen "Islam memleketi – Horasan" tobyna tiesili kólikti joiǵanyn, bul kólikpen terrorlyq shabýyl josparlanǵanyn málimdedi. Al "Taliban" ókilderi bul shabýyldan qarapaiym turǵyndar qaza bolǵanyn aitty. Tolo news agenttigin, áýe shabýylynan soń kemi 10 turǵyn qaza tapqanyn, mert bolǵandardyń arasynda balalar da baryn habarlady.
AQSh áskerileri bul aqparatty tekseretinderin málimdedi.
Qazir tálipter áielderdiń bilim alýyna, jumys isteýine múmkindik beretinin aitady, biraq áielderdiń kiimi islam zańyna sai kelý kerek dep talap etedi. Alaida aýǵan jurty tálipterdiń sózine kúmánmen qaraidy.
"Taliban" ókilderiniń agenttikterge aitýynsha, tálipter 31 tamyzdan soń jinalyp, Aýǵanstannyń bolashaq úkimetiniń jaǵdaiyn talqylaidy.
