بٷگٸن 21 جاسقا دەيٸنگٸ جاستار اراسىندا 2021 جىلعى ەۋروپا چەمپيوناتىنا ٸرٸكتەۋ ويىندارى ٶتتٸ. قازاقستان جاستار قۇراماسى ٶز الاڭىندا چەرنوگورييانى قابىلدادى, دەپ حابارلايدى "ۇلت اقپارات".
ٸرٸكتەۋ ساتىسىن قازاقستاندىق فۋتبولشىلار سەتتٸ باستاعان ەدٸ. الدىمەن سىرت الاڭدا فارەر ارالدارىن 3:1, چەرنوگورييانى 2:1 ەسەبٸمەن سٷرٸندٸردٸ. ودان كەيٸن ٶز الاڭىندا يسپانييادان 0:1, يزرايلدەن 1:2 ەسەبٸمەن جەڭٸلٸپ قالدى. ال بەسٸنشٸ كەزدەسۋٸندە سولتٷستٸك ماكەدونييامەن 1:1 ەسەبٸمەن تەڭ تارقاستى.
بەس ويىننان كەيٸن جاستارىمىز تۋرنير كەستەسٸندە 7 ۇپايمەن ٷشٸنشٸ ورىندا تۇرعان بولاتىن. بٷگٸنگٸ كەزدەسۋدە باسىم تٷسسە جاعدايىن جاقسارتىپ الار ەدٸ. دەگەنمەن ويىن بارىسى باسقاشا ٶربٸدٸ.
ەكٸنشٸ كەزەڭدە چەرنوگورييا ساپىنان ميلۋتين وسمايچ 25, 68-مينۋتتاردا قوس گولدىڭ اۆتورى اتاندى. ال 80-مينۋتتا قارسىلاس كوماندا قاتارىنان ماركو راكويانتس ەسەپتٸ ۇلعايتا تٷستٸ. 90-مينۋتتا يلييا ۆۋكوتيچ قورىتىندى ەسەپتٸ بەلگٸلەدٸ. وسىلايشا قازاقستان جاستارى قارسىلاسىنا 0:4 ەسەبٸمەن جەڭٸلٸپ قالدى.
ەندٸ قازاقستان جاستار قۇراماسى تٶرت ويىن ٶتكٸزەدٸ. الدىمەن, 8 قىركٷيەكتە سىرت الاڭدا يزرايلمەن شەبەرلٸك بايقاسادى. 8 قازاندا ٶز الاڭىندا سولتٷستٸك ماكەدونييامەن كەزدەسسە, 13 قازاندا سىرت الاڭدا يسپانييامەن جاسىل الاڭعا شىعادى. سوڭعى ويىنىندا 17 قاراشادا فارەر ارالدارىن قابىلدايدى.
ەستەرٸڭٸزگە سالا كەتەلٸك, 21 جاسقا دەيٸنگٸ جاستار قۇرامالارى اراسىنداعى ەۋروپا چەمپيوناتى 2021 جىلدىڭ 9-26 ماۋسىم ارالىعىندا ۆەنگرييا جەنە سلوۆەنييادا ٶتكٸزٸلەدٸ. وندا بارلىعى 16 قۇراما باق سىنايدى.
