بٷگٸن فۋتبولدان پرەمەر-ليگا كوماندالارى اراسىنداعى قازاقستان بٸرٸنشٸلٸگٸنٸڭ العاشقى تۋرىندا ٷش ويىن ٶتتٸ, دەپ حابارلايدى "ۇلت اقپارات".
ەل بٸرٸنشٸلٸگٸن الماتىدا جەرگٸلٸكتٸ «قايرات» پەن تالدىقورعاننىڭ «جەتٸسۋ» كوماندالارى اراسىنداعى كەزدەسۋ اشتى. ٶتكەن جىلعى ەل چەمپيونى قارسىلاسىنىڭ وسال تۇسىن تابا بٸلدٸ. ولاردىڭ قاتارىنان نەبويشا كوسوۆيچ 69, گۋلجٸگٸت الىقۇلوۆ 72-مينۋتتاردا كٶزدەگەن نىسانادان مٷلت كەتكەن جوق. نەتيجەسٸندە الماتىلىق كلۋب 2:0 ەسەبٸمەن باسىم تٷستٸ.
تاعى بٸر كەزدەسۋ تٷركٸستان قالاسىندا ٶتكٸزٸلدٸ. جەرگٸلٸكتٸ «تۇران» ەلوردالىق «استانا» كلۋبىمەن شەبەرلٸك بايقاستى. ويىن بارىسىندا ەلوردالىق مارين توماسوۆ 9-مينۋتتا ەسەپ اشسا, تٷركٸستاندىق تاڭات نٶسەرباەۆ 18-مينۋتتا تارازى باسىن تەڭەستٸردٸ. ال 54-مينۋتتا ابزال بەيسەبەكوۆ سوققان گولدان كەيٸن «استانا» تاعى دا العا شىقسا, 68-مينۋتتا تٷركٸستاندىق ماردان تٶلەبەك قورىتىندى ەسەپتە بەلگٸلەدٸ. ويىن 2:2 ەسەبٸمەن تەڭ اياقتالدى.
«اتىراۋ» كومانداسى ٶز الاڭىندا قاراعاندىنىڭ «شاحتەر» كلۋبىن قابىلدادى. ويىن تاعدىرىن قاراعاندىلىق كلۋب ساپىنان ۆيتاليي بالاشوۆ 14-مينۋتتا سوققان جالعىز گول شەشٸپ, كەنشٸلەر 1:0 ەسەبٸمەن جەڭٸسكە جەتتٸ.
ەندٸ 14 ناۋرىزدا بٸرٸنشٸ تۋرداعى قالعان تٶرت ويىن بولادى. الدىمەن 15.00-دە «كاسپيي» (اقتاۋ) مەن «اقتٶبە», «ورداباسى» (شىمكەنت) مەن «قىزىلجار» (پەتروپاۆل), 17.00-دە «قايسار» (قىزىلوردا) مەن «تاراز», «توبىل» (قوستاناي) مەن «اقجايىق» (ورال) كوماندالارى شەبەرلٸك بايقاسادى.
