حالىقارالىق فۋتبول فەدەراتسيياسى («FIFA) ونلاين-فورماتتا ٶتٸپ جاتقان رەسمي اشىلۋ رەسٸمٸندە جىل قورىتىندىسىن شىعاردى. ەرلەر فۋتبولىنداعى جىلدىڭ ٷزدٸك ويىنشىسى بولىپ پولشا قۇراماسىنىڭ شابۋىلشىسى روبەرت لەۆاندوۆسكي اتاندى, دەپ حابارلايدى championat.com سايتى.
ول وسى جٷلدەگە تالاسقان «يۋۆەنتۋس» شابۋىلشىسى كريشتيانۋ رونالدۋ مەن «بارسەلونا» شابۋىلشىسى ليونەل مەسسيدٸ باسىپ وزدى.
ماراپاتتاۋ رەسٸمٸنٸڭ ونلاين فورماتىنا قاراماستان, FIFA پرەزيدەنتٸ دجانني ينفانتينو ماراپاتتى جەڭٸمپازدىڭ قولىنا تاپسىرۋ ٷشٸن ميۋنحەنگە كەلدٸ.
بۇل – 32 جاستاعى فۋتبولشىنىڭ العاشقى ماراپاتى. ال سىيلىقتىڭ بۇدان بۇرىنعى يەگەرٸ ليونەل مەسسي ەدٸ.
2020 جىلى لەۆاندوۆسكي «باۆارييا» قۇرامىندا چەمپيوناتتى جەنە گەرمانييا كۋبوگىن جەڭٸپ الىپ, ۋەفا چەمپيوندار ليگاسىنىڭ جەڭٸمپازى اتاندى. روبەرت بۋندەسليگانىڭ دا, چەمپيوندار ليگاسىنىڭ دا ٷزدٸك بومبارديرٸ بولدى. FIFA ماراپاتى فرانتسۋزدىق France Football باسىلىمى ۇسىناتىن «التىن دوپ» سىيلىعىنان ٶزگەشە. 2020 جىلى جۋرنال ەڭ جاقسى ويىنشىنى تاڭداماۋعا شەشٸم قابىلداعان ەدٸ.
