ٷكٸمەتتٸڭ كەڭەيتٸلگەن وتىرىسىندا پرەزيدەنت قاسىم-جومارت توقاەۆ ۋتيليزاتسييالىق الىم مەسەلەسٸنە ارنايى توقتالدى, دەپ حابارلايدى "ۇلت اقپارات".
"ۋتيليزاتسييالىق الىم بويىنشا بارلىق قاراجات مەملەكەت پايداسىنا تٷسەدٸ دەپ شەشتٸك. ەندٸگٸ مەسەلە – مٶلشەرلەمە دەڭگەيٸن انىقتاۋ. جۇمىس توبى وسى مەسەلەنٸ قىزۋ تالقىلاپ جاتىر. بٸردەن ايتايىن, ۋتيليزاتسييالىق الىم قايتا قارالادى. بٸراق شەكتەن شىقپاعان جٶن. اۆتوٶنەركەسٸپتٸ دامىتۋعا جۇمسالعان اقشانى جەلگە شاشۋدىڭ, ەسكٸ اۆتوكٶلٸكتەردٸ سىرتتان ەكەلٸپ, قالدىقتان نارىق اشۋدىڭ قاجەتٸ جوق. ۋتيليزاتسييالىق نەمەسە تٸركەۋ الىمى تٷپكٸ ماقسات ەمەس. باستىسى – تۇتىنۋشىلار ٷشٸن اۆتوكٶلٸكتەر مەن اۋىل شارۋاشىلىعى تەحنيكاسىنىڭ قولجەتٸمدٸلٸگٸن قامتاماسىز ەتۋ. ٶندٸرۋشٸلەر مەن ديستريبيۋتەرلەر تاراپىنان ەرەكەت بولادى دەپ سەنەمٸن. ٷكٸمەتتٸڭ الدىن الا بايانداماسى ونىڭ دۇرىس جولدا ەكەنٸن كٶرسەتەدٸ", - دەدٸ مەملەكەت باسشىسى.
