«وليمپ» كلينيكالىق-دياگنوستيكالىق زەرتحانالارى 13 سەۋٸردەن باستاپ نۇر-سۇلتان مەن الماتى قالالارىندا كوروناۆيرۋس بويىنشا تەگٸن تەستەن ٶتۋگە بولاتىنىن جارييا ەتتٸ, - دەپ حابارلادى «وليمپ» كدز Facebook پاراقشاسىندا.
«قۇرمەتتٸ پاتسيەنتتەر. 13 سەۋٸردەن باستاپ الماتى مەن نۇر-سۇلتاندا كوروناۆيرۋس بويىنشا تەگٸن ەكسپرەس-تەستٸلەۋدەن ٶتۋگە بولاتىنىن حابارلايمىز. ودان ٶتۋ ٷشٸن پاتسيەنت www.cdl.kz سايتىندا انكەتا تولتىرۋى كەرەك. دەنساۋلىق ساقتاۋ مينيسترلٸگٸنٸڭ ەپيدەميولوگتارى ادامدار توبىنىڭ ەپيدەميولوگييالىق انىقتاماسى نەگٸزٸندە تاڭدايدى. ارتىنشا بەكٸتٸلگەن تٸزٸمدەر «وليمپ» كدز-عا تٷسەدٸ», - دەپ جازدى.
تٸزٸمدە بەكٸتٸلگەن پاتسيەنتكە بايلانىس ورتالىعىنىڭ وپەراتورى حابارلاسىپ, قاي جەرگە قاي ۋاقىتتا كەلۋٸ كەرەكتٸگٸن ايتادى.
«وپەراتور نۇسقاعان پروتسەدۋرالىق كابينەتكە ماسكا كيٸپ, جەكە كۋەلٸكتٸ الىپ, كەشٸكپەي كەلۋ كەرەك. كەزەكتە تۇرعان ادامدار بٸر-بٸرٸنەن 1,5-2 مەتر قاشىقتىقتا بولۋى تيٸس. پروتسەدۋرالىق كابينەتتەن ٶتكەننەن كەيٸن كوروناۆيرۋس بويىنشا ەكسپرەس-تەست الىنادى. اناليز قورىتىندىسى انكەتادا كٶرسەتٸلگەن پوشتاعا جولدانادى. ماڭىزدى جايت: پاتسيەنتتٸڭ تەمپەراتۋراسى بايلانىسسىز ٶلشەۋ قۇرالىمەن جٷرگٸزٸلەدٸ. قىزۋى كٶتەرٸلٸپ تۇرعان ادامنان اناليز الىنبايدى. ٶزدٸگٸمەن پروتسەدۋرالىق كابينەتكە, وپەراتورمەن سٶيلەسپەي كەلۋگە بولمايدى», - دەپ ەسكەرتەدٸ «وليمپتان».
