ەلباسى كٶرنەكتٸ قالامگەر, قازاقستاننىڭ حالىق جازۋشىسى, مەملەكەتتٸك سىيلىقتىڭ لاۋرەاتى قابدەش جۇمادٸلوۆتٸڭ ٶمٸردەن ٶتۋٸنە بايلانىستى ورنى تولماس اۋىر قايعىعا ورتاقتاسىپ, كٶڭٸل ايتتى, دەپ حابارلايدى قر تۇڭعىش پرەزيدەنتٸنٸڭ باسپاسٶز قىزمەتٸ.
قازاقستاننىڭ تۇڭعىش پرەزيدەنتٸ قابدەش جۇمادٸلۇلى قارىمدى شىعارماشىلىعىمەن, قاجىرلى قايراتكەرلٸگٸمەن قازاق ەدەبيەتٸنٸڭ دامۋىنا قوماقتى ٷلەس قوسقان اسا تالانتتى تۇلعا بولعانىن اتاپ ٶتتٸ.
«دارابوز دارىن يەسٸ ٶزٸنٸڭ مازمۇنى باي كٶپتەگەن ەڭگٸمەلەرٸ مەن حيكاياتتارى, كەڭ تىنىستى ەپيكالىق روماندارى ارقىلى ۇلتتىق پروزانىڭ ٶسٸپ-ٶركەندەۋٸنە ٶلشەۋسٸز ەڭبەك سٸڭٸرٸپ, قيلى زامانداردا تٷرلٸ تەپەرٸش كٶرگەن قازاق حالقىنىڭ تالايلى تاعدىرى مەن تاريحىن, اۋمالى-تٶكپەلٸ تۇتاس دەۋٸردٸڭ كەلبەتٸن قاپىسىز سومدادى. ونىڭ سوڭىندا قالعان كەسەك تۋىندىلارى – ەدەبيەتٸمٸزدٸڭ التىن قورىندا ساقتالاتىن شىن مەنٸندەگٸ قۇندى رۋحاني قازىنا.
الاش جۇرتىنىڭ قالتقىسىز قۇرمەتٸنە بٶلەنگەن ابزال ازاماتتىڭ ەسٸمٸ مەن جارقىن بەينەسٸ جۇرتشىلىق جادىنان ەشقاشان ۇمىتىلمايدى دەپ سەنەمٸن», – دەلٸنگەن جەدەلحاتتا.
