ەكولوگييا, گەولوگييا جەنە تابيعي رەسۋرستار مينيسترلٸگٸنٸڭ بالىق شارۋاشىلىعى كوميتەتٸ كاسپيي جاعالاۋىنان تابىلعان ٶلٸ يتبالىققا قاتىستى تٷسٸنٸك بەردٸ, دەپ حابارلايدى "ۇلت اقپارات".
ايتا كەتەيٸك, اقتاۋ قالاسىندا كاسپيي تەڭٸزٸ جاعالاۋىنان تابىلعان ٶلٸ يتبالىق تۋرالى اقپارات 18 شٸلدە كٷنٸ Instagram-دا پايدا بولدى.
«يتبالىق تابىلعان جەرگە جەدەل تٷردە باسقارما باسشىسى ا. شيحمەتوۆ باستاعان جايىق-كاسپيي وبلىسارالىق باسسەيندٸك بالىق شارۋاشىلىعى ينسپەكتسيياسىنىڭ ماڭعىستاۋ وبلىسى بويىنشا بالىق شارۋاشىلىعى باسقارماسىنىڭ مەملەكەتتٸك ينسپەكتورلارىنان قۇرىلعان توپ جٸبەرٸلدٸ. وقيعا ورنىنا كەلگەن كەزدە يتبالىقتىڭ دەنەسٸ تابىلدى. قۇيرىعى تٷكسٸز, ىدىراۋ كٷيٸندە بولدى. الدىن الا اقپارات بويىنشا, جانۋار بٸرنەشە اي بۇرىن تەڭٸزدە ٶلگەن, كەيٸن تەڭٸز داۋىلىمەن اقتاۋ قالاسى ماڭىنداعى جاعالاۋعا شىعىپ قالعان» دەپ تٷسٸندٸردٸ ۆەدومستۆو.
جانۋاردىڭ دەنەسٸندە بالىق اۋلاۋ قۇرالدارىنىڭ ٸزٸ, تۇنشىعۋ, سونداي-اق زورلىق-زومبىلىق بەلگٸلەرٸ جوق.
«سول سەبەپتٸ تابيعاتتى قورعاۋ پوليتسيياسى مەن ۆەتەرينارلىق قىزمەت ٶكٸلدەرٸ وقيعا ورنىنا شاقىرىلمادى. جەلٸدە تاراعان اقپاراتتا يتبالىقتىڭ اينالاسى قان ەكەنٸ ايتىلادى. بٸراق ونىڭ قان ەمەس, كٷن سەۋلەسٸ ەسەرٸنەن جانۋاردىڭ دەنەسٸنەن اعىپ جاتقان تەرٸ استىنداعى ماي ەكەنٸن حابارلايمىز» دەپ حابارلايدى ەكولوگييا, گەولوگييا جەنە تابيعي رەسۋرستار مينيسترلٸگٸ.
