اقش پرەزيدەنتٸ دونالد ترامپ 20 قاڭتاردا, جاڭا سايلانعان پرەزيدەنت دجو بايدەننٸڭ يناۋگۋراتسيياسىنا ٷش ساعات قالعاندا, اق ٷيدەن كەتتٸ. جۋرناليستەر الدىنا شىققان ترامپ "اقش پرەزيدەنتٸ بولۋ – مەرتەبە" دەدٸ.
ول اق ٷي اۋماعىنان ٷكٸمەتتٸڭ تٸكۇشاعىمەن ۇشىپ كەتتٸ دە, ەندريۋس بازاسىنا قوشتاسۋ رەسٸمٸنە كەلدٸ. ترامپ قوشتاسۋ رەسٸمٸندە امەريكالىقتار ٷشٸن "ەرقاشان كٷرەسۋگە دايىن ەكەنٸن" ايتىپ, بايدەن ەكٸمشٸلٸگٸنە "سەتتٸلٸك" تٸلەدٸ.
"سٸزدەر عاجاپسىزدار. بۇل – ۇلى ەل. سٸزدەرگە پرەزيدەنت بولۋ – ٷلكەن مەرتەبە" دەدٸ ول جاقتاستارى مەن وتباسى جينالعان جيىندا.
شاراعا ۆيتسە-پرەزيدەنت مايك پەنس كەلگەن جوق. ول ترامپپەن كەشە, 19 قاڭتاردا قوشتاسقان. ترامپ پەن پەنستٸڭ اراسى كاپيتولييدەگٸ وقيعادان كەيٸن سۋىپ كەتكەن.
ترامپ اق ٷيدەن كەتەرٸنٸڭ الدىندا الاياقتىق ايىبىمەن جازالانعان 150-دەي ادامعا كەشٸرٸم بەرۋ تۋرالى قۇجاتقا قويدى.
ترامپ بىلتىر قاراشادا ٶتكەن پرەزيدەنت سايلاۋىندا دەموكرات دجو بايدەننەن جەڭٸلگەن. ول سايلاۋ نەتيجەسٸمەن كەلٸسپەي بٸرنەشە شاعىم تٷسٸرگەنٸمەن, سوت ونىڭ ارىزدارىن كەرٸ قايتارعان.
6 قاڭتاردا كاپيتولييدە بايدەننٸڭ جەڭٸسٸن رەسٸمدەۋ جيىنى ٶتەردەن بۇرىن ترامپ اق ٷي جانىندا ٶز جاقتاستارىنا قايىرىلىپ, "بٸز ەشقاشان بەرٸلمەيمٸز, ەشقاشان جەڭٸلمەيمٸز, ۇرلىقتى توقتاتىڭىزدار" دەگەن ەدٸ. ترامپتىڭ وسى سٶزٸنەن كەيٸن ونىڭ اشۋلى جاقتاستارى 1,6 شاقىرىم جەردە ورنالاسقان كاپيتولييگە بارىپ, باسىپ كٸرٸپ, سايلاۋ نەتيجەسٸن رەسٸمدەۋ شاراسىن ٶتكٸزۋگە كەدەرگٸ كەلتٸردٸ. ساياساتكەرلەر جيىن ٶتەتٸن زالدى تاستاپ كەتۋگە مەجبٷر بولعان. ولار جۇمىسىن 7 قاڭتاردا جالعاستىرىپ, بايدەننٸڭ جەڭٸسٸن رەسٸمدەدٸ.
كاپيتولييدەگٸ جاعدايدان بەس ادام قازا تاۋىپ, 52 ادام ۇستالدى.
