مەسكەۋدەگٸ مەششانسكيي سوتى قالاداعى كراسنوسەلسكيي اۋدانىنىڭ مۋنيتسيپالدىق دەپۋتاتى الەكسەي گورينوۆتى رەسەي ەسكەرٸ تۋرالى "فەيك" اقپارات تاراتتى دەپ جەتٸ جىلعا سوتتادى. گورينوۆ - "رەسەي ەسكەرٸ جايلى فەيك تاراتۋ" بابى بويىنشا تٷرمەگە قامالعان العاشقى ادام, دەپ حابارلايدى ازاتتىق.
سۋديا ولەسيا مەندەلەەۆا گوردينوۆتىڭ ايىبى تولىق دەلەلدەندٸ دەپ سانايدى, پروكۋرور دا سوتتان دەپۋتاتتى جەتٸ جىلعا سوتتاۋدى سۇراعان. بۇدان بٶلەك گوردينوۆقا تٶرت جىل مەملەكەتتٸك ورگانداردا جۇمىس ٸستەۋگە تىيىم سالىندى. دەپۋتات جازاسىن قونىس كولونيياسىندا ٶتەيدٸ.
گوردينوۆ ٶزٸنە تاعىلعان ايىپتى مويىنداماي, سوڭعى سٶزٸندە سوعىستى "ادامدىقتان ايىرىلۋدىڭ ەڭ تەز جولى" دەپ اتادى. سوت ٷكٸمٸ شىققان وتىرىستا الەكسەي گورينوۆ قولىنا "سٸزدەرگە بۇل سوعىس ەلٸ كەرەك پە?" دەگەن پلاكات ۇستاپ تۇردى. سوت زالىنداعى قاراۋىلدار بۇل پلاكاتتى بارىنشا جابۋعا تىرىستى.
قىلمىستىق ٸسكە 15 نۋرىزداعى دەپۋتاتتار وتىرىسىنداعى ۆيدەوجازبا سەبەپ بولعان. جيىندا گورينوۆ "ۋكرايناداعى اگرەسسييا قۇرباندارىن ەسكە الۋ ٷشٸن" بٸر مينۋتتىق ٷنسٸزدٸك جارييالاۋدى سۇرايدى. دەپۋتاتتاردىڭ بەرٸ كەلٸسٸپ, ورىندارىنان تۇرادى. كەيٸن گورينوۆ بالالار اراسىنداعى بارلىق كونكۋرستى ٶتكٸزبەۋدٸ ۇسىنىپ, "ۋكرايناداعى سوعىستا جٷزدەي بالا وپات بولعانىن" ايتادى.
ارتىنشا بۇل جيىننىڭ ۆيدەوسىن تەلەجٷرگٸزۋشٸ ەرٸ اكتريسا مارييا شۋكشينا ينتەرنەتكە جارييالايدى دا, ارتىنشا ٸس قوزعالادى.
ايتا كەتەيٸك, رەسەي ۋكرايناعا باسقىنشىلىعىن "ارنايى وپەراتسييا" دەپ اتايدى. ال سوعىس سٶزٸن قولدانعانداردى "فەيك تاراتتى" دەگەن ايىپپەن قۋدالايدى.
