Máskeýdegi Meshanskii soty qaladaǵy Krasnoselskii aýdanynyń mýnitsipaldyq depýtaty Aleksei Gorinovty Resei áskeri týraly "feik" aqparat taratty dep jeti jylǵa sottady. Gorinov - "Resei áskeri jaily feik taratý" baby boiynsha túrmege qamalǵan alǵashqy adam, dep habarlaidy Azattyq.
Sýdia Olesia Mendeleeva Gordinovtyń aiyby tolyq dáleldendi dep sanaidy, prokýror da sottan depýtatty jeti jylǵa sottaýdy suraǵan. Budan bólek Gordinovqa tórt jyl memlekettik organdarda jumys isteýge tyiym salyndy. Depýtat jazasyn qonys koloniiasynda óteidi.
Gordinov ózine taǵylǵan aiypty moiyndamai, sońǵy sózinde soǵysty "adamdyqtan aiyrylýdyń eń tez joly" dep atady. Sot úkimi shyqqan otyrysta Aleksei Gorinov qolyna "Sizderge bul soǵys áli kerek pe?" degen plakat ustap turdy. Sot zalyndaǵy qaraýyldar bul plakatty barynsha jabýǵa tyrysty.
Qylmystyq iske 15 nýryzdaǵy depýtattar otyrysyndaǵy videojazba sebep bolǵan. Jiynda Gorinov "Ýkrainadaǵy agressiia qurbandaryn eske alý úshin" bir minýttyq únsizdik jariialaýdy suraidy. Depýtattardyń bári kelisip, oryndarynan turady. Keiin Gorinov balalar arasyndaǵy barlyq konkýrsty ótkizbeýdi usynyp, "Ýkrainadaǵy soǵysta júzdei bala opat bolǵanyn" aitady.
Artynsha bul jiynnyń videosyn telejúrgizýshi ári aktrisa Mariia Shýkshina internetke jariialaidy da, artynsha is qozǵalady.
Aita keteiik, Resei Ýkrainaǵa basqynshylyǵyn "arnaiy operatsiia" dep ataidy. Al soǵys sózin qoldanǵandardy "feik taratty" degen aiyppen qýdalaidy.
