قر دەنساۋلىق ساقتاۋ ۆيتسە-مينيسترٸ اجار عينييات جەدەل جەردەم قىزمەتكەرلەرٸ شاقىرتۋ تٷسكەن جاعدايدا جاعىمسىز جاعدايلارمەن جيٸ كەزدەسٸپ جاتقانىن مەلٸم ەتتٸ, دەپ حابارلايدى قازاقپارات.
«جەدەل جەردەم قىزمەتٸنٸڭ مەديتسينا قىزمەتكەرلەرٸ شاقىرتۋلار كەزٸندە جاعىمسىز ەموتسييالىق جاعدايلارمەن كٶپ كەزدەسەدٸ. ولار ٶتە جوعارى فيزيكالىق جەنە پسيحيكالىق جاعدايدا جۇمىس ٸستەپ جاتىر. شاقىرتۋلار بويىنشا قىزمەت كٶرسەتۋ دەڭگەيٸ بٸرٸنشٸ كەزەكتە پاتسيەنتتەردٸڭ جاعدايىنىڭ اۋىرلىعىنا بايلانىستى انىقتالادى. سوندىقتان مەديتسينالىق قىزمەتكەرلەرگە رەنجٸمەي, ٶز كەزەكتەرٸڭٸزدٸ كٷتكەندەرٸڭٸز دۇرىس», - دەدٸ ول وكق-دا ٶتكەن باسپاسٶز مەسليحاتىندا.
اجار عينيياتتىڭ ايتۋىنشا, تەستٸلەۋدٸ جٷرگٸزۋ تٶڭٸرەگٸندەگٸ داۋلى جاعداي پتر-تەست تاپشىلىعىنا بايلانىستى ەمەس. وسى ۋاقىتقا دەيٸن قازاقستاندا 1,5 ملن تەست جٷرگٸزٸلگەن.
«ودان بٶلەك قوسىمشا 1,2 ملن تەست ساتىلىپ الىنۋدا. ازاماتتاردىڭ كٶپشٸلٸگٸ بٸر مەزگٸلدە جٷگٸنگەن جاعدايدا پتر-اناليزاتورلارى بار 56 زەرتحانانىڭ ٶتكٸزۋ قابٸلەتٸ جەتكٸلٸكسٸز بولىپ وتىر. وسىعان بايلانىستى كەزەك قالىپتاسىپ قالادى. وسى جىلى تامىز ايىنىڭ سوڭىنا دەيٸن 20 پتر-اناليزاتور ساتىلىپ الىنىپ, زەرتحانالار سانى كٶبەيەدٸ. تەستٸلەۋ دەرٸگەرلەردٸڭ كەڭەسٸ بويىنشا ٶتكٸزٸلۋٸ تيٸس», - دەدٸ ول.
