قازاقستاندىق بوكسشى دانييار ەلەۋسٸنوۆ (5-0, 3 كو) اقش-تا كەسٸپقوي رينگتەگٸ التىنشى جەكپە-جەگٸن ٶتكٸزدٸ, دەپ حابارلايدى Sports.kz.
وتانداسىمىز فيلادەلفيياداعى (اقش, پەنسيلۆانييا شتاتى) Liacouras Center ارەناسىندا ٶتكەن بوكس كەشٸندە جۇدىرىقتاستى. ەلەۋسٸنوۆ جارتىلاي ورتا سالماقتا 36 جاستاعى مەكسيكالىق سيلۆەريو ورتيسپەن (37-23, 18 كو) قولعاپ تٷيٸستٸردٸ.
سەگٸز راۋندتىق جەكپە-جەك سوڭىنا دەيٸن سوزىلدى. ەلەۋسٸنوۆ قارسىلاسىن تٶرەشٸلەردٸڭ شەشٸمٸ بويىنشا ۇپاي سانىمەن جەڭدٸ.
وسىلايشا, قازاقستاندىق سپورتشى كەسٸپقوي بوكستاعى التىنشى جەڭٸسٸنە قول جەتكٸزٸپ وتىر, ونىڭ ٷشەۋٸ – نوكاۋتپەن. ال ورتيس ٷشٸن بۇل سپورتتىق مانسابىنداعى 24-شٸ جەڭٸلٸس.