شىعىس قازاقستان وبلىسىنىڭ ەكٸمٸ دانيال احمەتوۆ التاي اۋدانىندا قۇدىققا قۇلاپ كٶز جۇمعان بالانىڭ اتا-اناسىنا كٶڭٸل ايتتى, دەپ حابارلايدى قازاقپارات.
«كٸشكەنتاي ەليحان تالعاتوۆتىڭ اتا-اناسى مەن جاقىندارىنا وتباسى تاعدىرىنا تٷسكەن اۋىر قايعىلارىنا ورتاقتاسا, كٶڭٸل ايتامىن. تٶرت كٷن بويى اۋدان ەكٸمٸ, بارشا التايلىقتار, سرەديگورنىي اۋىلىنىڭ تۇرعىندارى, سونداي-اق ەرٸكتٸلەر مەن قيىن جاعدايدا شەت قالماي, قول ۇشىن سوزعان ازاماتتار بٷلدٸرشٸندٸ ٸزدەۋ جۇمىستارىنا قاتىستى. قاپىدا باۋىر ەتٸ بالاسىنان ايىرىلىپ قالۋ – ورنى تولماس قاسٸرەت. كٸشكەنتاي ەليحاننىڭ جارقىن بەينەسٸ ەربٸرٸمٸزدٸڭ جٷرەگٸمٸزدە مەڭگٸ ساقتالادى. جانى جەنناتتا بولسىن! اۋداندىق ەكٸمدٸك تاراپىنان جەرلەۋ رەسٸمٸن ۇيىمداستىرۋعا جان-جاقتى كٶمەك كٶرسەتٸلەدٸ», - دەپ جازدى ول ٶزٸنٸڭ Facebook پاراقشاسىندا.
ەسكە سالساق, 18 تامىز كٷنٸ شقو-نىڭ التاي اۋدانىندا 2 جاسار سەبي ٶز ٷيٸنٸڭ اۋلاسىنان جوعالىپ كەتكەن بولاتىن. ونى ٸزدەۋ ٷشٸن ٶسكەمەننەن ارنايى ماماندار جٸبەرٸلٸپ, ەۋەدەن درون ارقىلى ٸزدەۋ جٷرگٸزٸلگەن. 20 تامىزدا سەبيدٸڭ مٷردەسٸ ٶز ٷيٸنٸڭ اۋلاسىنداعى قۇدىقتان تابىلدى.
