UFC-دە ٶنەر كٶرسەتەتٸن قازاق سپورتشىسى دامير ىسماعۇلوۆ كەلەسٸ جەكپە-جەگٸ قاشان ٶتۋٸ مٷمكٸن ەكەنٸن ايتتى, دەپ حابارلايدى "ۇلت اقپارات".
«باقىتىما وراي العان جاراقاتىم تولىقتاي جازىلىپ, قايتا قالپىما كەلدٸ. ەندٸ بٸر اپتادان كەيٸن تولىققاندى جاتتىعۋعا كٸرٸسۋگە دايىن بولامىن. مەنەدجەرٸمنەن كەلەسٸ جەكپە-جەككە قاشان شىعا الاتىنىمدى سۇراعان ەدٸم. جەكپە-جەككە شىعۋ ٷشٸن سالماقتى تۋرنيرلەردٸڭ بٸرٸن كٷتٸپ وتىرمىز», - دەدٸ ول ورتالىق كوممۋنيكاتسييالار قىزمەتٸندەگٸ باسپاسٶز مەسليحاتىنان كەيٸن قازاقپارات تٸلشٸسٸنە بەرگەن سۇحباتىندا.
سونىمەن قاتار ول الداعى جەكپە-جەگٸ شامامەن قاي ۋاقىتتا بولۋى مٷمكٸن ەكەنٸن دە ايتىپ بەردٸ.
«مەنٸڭشە, بٸر ايدىڭ ٸشٸندە, شامامەن اقپاندا UFC-دەگٸ كەلەسٸ, ياعني تٶرتٸنشٸ جەكپە-جەگٸمە قاتىستى مەسەلەلەر انىقتالادى. ال ٶزٸم كٶكتەمگە دەپ جوسپارلاپ وتىرمىن. قارسىلاسىم ٷزدٸك توپ-15-كە كٸرەتٸن سپورتشى بولماق. تٶبەلەسكٸم كەلەتٸن سپورتشىلار بار. جالپى مەن كٸممەن جەكپە-جەككە شىققىم كەلەتٸنٸن جيٸ ايتىپ قويامىن دا, كەيٸن ول بولماي قالىپ جاتادى. سوندىقتان الدىن الا ايتۋدى دوعاردىم. جەكپە-جەك بولسا ٶتە جاقسى. بولماسا كٷتۋگە تۋرا كەلەدٸ», - دەدٸ دامير ىسماعۇلوۆ.
