چەمپيوندار ليگاسى: «رەال» ٶز الاڭىندا جەڭٸلٸپ قالدى

بٷگٸن UEFA چەمپيوندار ليگاسى 1/8 فينالدىق كەزەڭٸنٸڭ العاشقى ويىندارى اياقتالدى, دەپ حابارلايدى "ۇلت اقپارات".

يسپانييانىڭ «رەالى» ٶز الاڭىندا انگلييانىڭ «مانچەستەر سيتي» كلۋبىن قابىلدادى. ەكٸ ۇجىم دا جەڭٸسكە جەتۋ جولىندا تىنباي تەر تٶكتٸ. بٸرٸنشٸ كەزەڭ ولاردىڭ الما-كەزەك شابۋىلىمەن ٶربٸدٸ. دەسە دە بٸر-بٸرٸنٸڭ قاقپاسىنان ساڭىلاۋ تابا العان جوق. «سيتي» شابۋىلشىسى گابي جەزۋس قاقپاشىمەن بەتپە-بەت شىققان. الايدا ونىڭ سوققىسىن قاقپاشى قايتاردى. بٸرٸنشٸ تايمدا قوناقتاردىڭ قورعاۋشىسى ايمەريك لياپورت جاراقات الىپ, الاڭنان كەتتٸ.

ەكٸنشٸ تايم «مانچەستەر سيتيدٸڭ» باسىمدىعىمەن ٶتتٸ. 59-مينۋتتا قارىمتا شابۋىل كەزٸندە «رەال» ەسەپ اشقان. قورعاۋشىلاردى الداپ ٶتكەن ۆينيسيۋس جۋنيور ەرٸپتەسٸ يسكوعا پاس بەردٸ. سوڭعىسى قاتەلەسكەن جوق. ەسەپ – 1:0! قارىمتا شابۋىلداردىڭ بٸرٸندە اعىلشىندىق كلۋبتىڭ ويىنشىسى گابي جەزۋس تارازى باسىن تەڭەستٸرٸپ كەتتٸ. ول ايىپ الاڭىنا اسىرىلعان دوپتى قاقپاعا باسپەن كٸرگٸزدٸ. مۇنان سوڭ كەۆين دە بريۋينە پەنالتيدەن كٶزگە تٷسٸپ, ەسەپتٸ 1:2 قىلدى. ويىن سوڭىنا تامان باس تٶرەشٸ «رەال» كاپيتانى سەرحيو راموستى تەرتٸپ بۇزعانى ٷشٸن الاڭنان قۋدى.

قاتار ٶتكەن «ليون»-«يۋۆەنتۋس» ماتچىندا فرانتسۋزدار باسىم بولدى. كەزدەسۋدەگٸ جالعىز گولدى تۋزار سوقتى.

وسىلايشا, چەمپيوندار ليگاسى 1/8 فينالدىق كەزەڭٸنٸڭ العاشقى ويىندارى اياقتالدى.