ۆيدەو كادرى
بايزاقتاعى ەسكەري بٶلٸمدە بولعان جارىلىسقا كٸنەلٸ دەپ ايىپتالعان ساربازدار سوتتا سوڭعى سٶزٸن ايتتى, دەپ حابارلايدى كتك ارناسى.
قاتارداعى جاۋىنگەر ەربولات تۇرانوۆ پەن ەسەت ەشٸرباي 18 ادامنىڭ ٶلٸمٸنە ٶزٸن كٸنەلٸ سەزٸنبەيدٸ. سەبەبٸ تەرگەۋشٸلەر قوقان-لوققى كٶرسەتٸپ, "قىلمىستى بٸزدٸڭ موينىمىزعا ٸلگٸسٸ كەلەدٸ" دەيدٸ.
"ٶمٸر بويىنا كەتەسٸڭ, چەلاحتىڭ قاسىنا باراسىڭ" دەدٸ. مەن سول كەزدە قورىقتىم. نە ٷشٸن مويىنداۋىم كەرەك دەگەن كەزدە, "موينىڭا الا سال, بۇل تٸرلٸكتٸ جابامىز, پروكۋرورمەن, استانامەن سٶيلەسٸپ قويدىق, سەندەرگە شارتتى جازا بەرەدٸ, شىعىپ كەتەسٸڭدەر" دەدٸ. بٸزدٸ بالا سيياقتى الدادى. مەن - كٸنەلٸ ەمەسپٸن", - دەدٸ ايىپتالۋشى.
«تەرگەۋدە قىسىم كٶردٸك» دەگەن قوس سارباز سوتتان ٶزٸن اقتاپ الۋدى سۇرادى. ەكەۋٸنەن بٶلەك, سوت زالىندا كٷدٸكتٸ دەپ تانىلعان تاعى تٶرت وفيتسەر وتىردى. بٸراق ولارعا ەلٸ سٶز بەرٸلگەن جوق.
ەسكە سالساق, 2021 جىلى تامىزدا جامبىل وبلىسى بايزاق اۋدانىنداعى №28349 ەسكەري بٶلٸمشەسٸنٸڭ قارۋ-جاراق قويماسى جارىلىپ, 18 ادام قازا تاپقان, تاعى 82 ادام جارالانعان. وسى وقيعادان كەيٸن جاقىن ماڭداعى اۋىل تۇرعىندارى قاۋٸپسٸز جەرگە كٶشٸرٸلگەن. بۇل ٸس بويىنشا 250-دەن استام ادام جەبٸرلەنۋشٸ رەتٸندە تانىلعان. بٸراق جارالانعاندار مەن مٷلكٸ بٷلٸنگەندەر وسىعان دەيٸنگٸ سوت وتىرىستارىندا جارىلىسقا دەل وسى ساربازدار كٸنەلٸ دەگەنگە سەنٸمسٸزدٸك بٸلدٸرگەن.
كەلەسٸ سوت وتىرىسى بٷگٸن ٶتەدٸ.
