فوتو: تۋريزم جەنە سپورت مينيسترلٸگٸ
يتالييادا ٶتٸپ جاتقان 2026 جىلعى قىسقى وليمپيادا ويىندارىندا 21 اقپان كٷنٸ قازاقستاندىق سپورتشىلار بٸرنەشە سپورت تٷرٸنەن سىنعا تٷسەدٸ, دەپ حابارلايدى Ult.kz inbusiness.kz-كە سٸلتەمە جاساپ.
فريستايل-اكروباتيكادان 14:45-تە ارالاس كوماندالىق سايىس ٶتەدٸ. بۇل سىندا ەل نامىسىن ايانا جولداس, رومان يۆانوۆ جەنە اسىلحان اسان قورعايدى. ارالاس كوماندالىق بەسەكەدە سپورتشىلار سينحروندى ەرٸ تەحنيكالىق كٷردەلٸ سەكٸرٸستەر ورىندايدى.
ال 15:00-دە شاڭعى جارىسىنان ماسس-ستارت بەسەكەسٸ باستالادى. قازاقستان اتىنان ەمٸرعالي مۇراتبەكوۆ پەن نايل باشماكوۆ جارىسقا قاتىسادى. ماسس-ستارتتا بارلىق سپورتشى بٸر ۋاقىتتا جولعا شىعادى.
سونداي-اق, بٷگٸن 21 اقپاننان 22 اقپانعا قاراعان تٷنٸ قىسقى وليمپيادا ويىندارى اياسىندا مەنەرلەپ سىرعاناۋشىلاردىڭ گالا-كونتسەرتٸ ٶتەدٸ. اتالعان شوۋعا قازاقستان ٶكٸلٸ ميحايل شايدوروۆ تا قاتىسادى. ول "كۋنگ-فۋ پاندا" مۋلتفيلمٸنٸڭ ستيلٸندەگٸ باعدارلاماسىن ورىندايدى. شوۋدىڭ ۇزاقتىعى 2,5 ساعات.
گالا-كەش بارىسىندا سپورتشىلار كٶرسەتٸلٸم باعدارلامالارىن ۇسىنادى. شوۋدىڭ باستالۋى - قازاقستان ۋاقىتىمەن 23:55. تٸكەلەي ەفير "Qazsport" تەلەارناسىنان كٶرسەتٸلەدٸ.
ەستەرٸڭٸزگە سالا كەتەيٸك, ميحايل شايدوروۆ ميلان مەن كورتينا-د’امپەتستسو وليمپياداسىندا ەرلەر اراسىنداعى جەكەلەي سىندا التىن مەدال جەڭٸپ الىپ, وليمپيادا چەمپيونى اتاندى. بۇل قازاقستان تاريحىنداعى قىسقى وليمپيادا ويىندارىنداعى مەنەرلەپ سىرعاناۋدان تۇڭعىش التىن جٷلدە.
اق وليمپيادا 22-اقپاندا اياقتالادى.
