Foto: Týrizm jáne sport ministrligi
Italiiada ótip jatqan 2026 jylǵy Qysqy Olimpiada oiyndarynda 21 aqpan kúni qazaqstandyq sportshylar birneshe sport túrinen synǵa túsedi, dep habarlaidy Ult.kz inbusiness.kz-ke silteme jasap.
Fristail-akrobatikadan 14:45-te aralas komandalyq saiys ótedi. Bul synda el namysyn Aiana Joldas, Roman Ivanov jáne Asylhan Asan qorǵaidy. Aralas komandalyq básekede sportshylar sinhrondy ári tehnikalyq kúrdeli sekirister oryndaidy.
Al 15:00-de shańǵy jarysynan mass-start básekesi bastalady. Qazaqstan atynan Ámirǵali Muratbekov pen Nail Bashmakov jarysqa qatysady. Mass-startta barlyq sportshy bir ýaqytta jolǵa shyǵady.
Sondai-aq, búgin 21 aqpannan 22 aqpanǵa qaraǵan túni Qysqy Olimpiada oiyndary aiasynda mánerlep syrǵanaýshylardyń gala-kontserti ótedi. Atalǵan shoýǵa Qazaqstan ókili Mihail Shaidorov ta qatysady. Ol "Kýng-fý Panda" mýltfilminiń stilindegi baǵdarlamasyn oryndaidy. Shoýdyń uzaqtyǵy 2,5 saǵat.
Gala-kesh barysynda sportshylar kórsetilim baǵdarlamalaryn usynady. Shoýdyń bastalýy - Qazaqstan ýaqytymen 23:55. Tikelei efir "Qazsport" telearnasynan kórsetiledi.
Esterińizge sala keteiik, Mihail Shaidorov Milan men Kortina-d’Ampetstso Olimpiadasynda erler arasyndaǵy jekelei synda altyn medal jeńip alyp, Olimpiada chempiony atandy. Bul Qazaqstan tarihyndaǵy Qysqy Olimpiada oiyndaryndaǵy mánerlep syrǵanaýdan tuńǵysh altyn júlde.
Aq Olimpiada 22-aqpanda aiaqtalady.
