فوتو: serke.org
ەۋرووداق كٶشباسشىلارى 16 ساعاتقا سوزىلعان كەلٸسسٶزدەر بارىسىندا ۋكرايناعا ەۋروپادا بۇعاتتالعان رەسەي اكتيۆتەرٸ ەسەبٸنەن قارجىلاي قولداۋ كٶرسەتۋ تەتٸگٸ بويىنشا ورتاق شەشٸمگە كەلە المادى. سوعان قاراماستان, ەو كيەۆكە 2026–2027 جىلدارعا ارنالعان 90 ملرد ەۋرو كٶلەمٸندەگٸ قارجىلاي كٶمەكتٸ ماقۇلدادى. بۇل تۋرالى ۆۆس جازدى, دەپ حابارلايدى Ult.kz "ادىرنا" سايتىنا سٸلتەمە جاساپ.
بۇل قاراجات ەۋرووداق بيۋدجەتٸمەن قامتاماسىز ەتٸلەتٸن قارىز ەسەبٸنەن بٶلٸنبەك. بۇل تۋرالى ۇزاق كەلٸسسٶزدەردەن كەيٸن ەو سامميتٸنٸڭ تٶراعاسى انتونيو كوستا ەلەۋمەتتٸك جەلٸلەردە حابارلادى.
اگەنتتٸك Reuters تانىسقان سامميت قورىتىندىسىنىڭ جوباسىنا سەيكەس, قارجى كاپيتال نارىقتارىنان قارىز الۋ ارقىلى, ياعني ەو بيۋدجەتٸنٸڭ كەپٸلدٸگٸمەن تارتىلماق. الايدا بۇل قاراجاتتىڭ ناقتى كٶزدەرٸ رەسمي تٷردە ناقتىلانعان جوق.
ۋكراينانى قارجىلاندىرۋدىڭ باستاپقى جوسپارى ەۋروپادا بۇعاتتالعان رەسەيدٸڭ ۆاليۋتالىق رەزەرۆتەرٸن پايدالانۋعا نەگٸزدەلگەن ەدٸ. جوسپارعا سەيكەس, ۋكراينا بۇل قاراجاتتى نەسيە رەتٸندە الىپ, ونى رەسەي سوعىس سالدارىنان كەلگەن شىعىن ٷشٸن رەپاراتسييا تٶلەگەننەن كەيٸن عانا ٶتەۋٸ تيٸس بولاتىن. قازٸرگٸ باعالاۋلار بويىنشا, سوعىس سالدارىنان كەلگەن جالپى شىعىن 500 ملرد دوللاردان اسادى.
دەگەنمەن, بۇل باستاماعا ەو-عا مٷشە بٸرنەشە ەل بٸردەن قارسى شىقتى. پرورەسەيشٸل ۇستانىمداعى چەحييا, ۆەنگرييا جەنە سلوۆاكييامەن قاتار, يتالييا دا كٷمەن بٸلدٸردٸ. ال نەگٸزگٸ قارسىلىقتى بەلگييا تانىتتى. سەبەبٸ دەل وسى ەلدە ەۋروپادا بۇعاتتالعان رەسەي اكتيۆتەرٸنٸڭ باسىم بٶلٸگٸ — 210 ملرد ەۋرونىڭ 193 ملرد ەۋروسى ساقتاۋلى تۇرعان Euroclear دەپوزيتارييٸ ورنالاسقان.
Financial Times باسىلىمىنىڭ كەلٸسسٶزدەرگە قاتىسى بار رەسمي تۇلعالارعا سٸلتەمە جاساپ حابارلاۋىنشا, بەلگييا نەسيەنٸ قامتاماسىز ەتۋگە بايلانىستى بارلىق قارجىلىق تەۋەكەلدەر ٷشٸن اۋقىمدى كەپٸلدٸكتەر تالاپ ەتكەن. بۇل تالاپتار ٶزگە ەۋروپالىق كٶشباسشىلار تاراپىنان قولداۋ تاپپاعان.
Reuters اگەنتتٸگٸنە پٸكٸر بٸلدٸرگەن ەۋروپالىق ديپلوماتتىڭ ايتۋىنشا, بۇل جاعدايدا ەو ۋكراينانى قۇتقارۋ مەسەلەسٸنەن گٶرٸ, باستامانى قولداعان تاراپتاردىڭ ساياسي بەدەلٸن ساقتاپ قالۋعا كٶبٸرەك نازار اۋدارعان.
وسىلايشا, ەۋرووداق رەسەي اكتيۆتەرٸن تٸكەلەي پايدالانۋدان باس تارتىپ, ۋكرايناعا قارجىلاي قولداۋدى بالاما مەحانيزم ارقىلى جٷزەگە اسىرۋعا شەشٸم قابىلدادى.
