اقتاۋ ەۋەجايىنا وبلىس ەكٸمٸ سەرٸكباي ترۇموۆ باستاعان 100-دەن استام ماڭعىستاۋلىق جينالىپ, بوكستان ەلەم چەمپيونى بەكزات نۇردەۋلەتوۆتٸ كٷتٸپ الدى, دەپ حابارلايدى "ۇلت اقپارات".
جينالعانداردىڭ قوشەمەتٸ مەن ىستىق ىقىلاسى زور بولدى. قولدارىنا پلاكات ۇستاپ, كٶك بايراعىمىزدى جەلبٸرەتكەن جاستار «بەكزات» دەپ ايقايلاۋمەن بولدى.
ۇشاقتان تٷسكەن بويدا شاشۋ شاشىلىپ, ۇلتتىق تاعامدار ۇسىنىلدى. بەكزات پەن باپكەرٸ مارات جەكيەۆتٸ كٷتٸپ العاندار قۇتتىقتاۋ لەبٸزٸن جاۋدىردى.
كەزدەسۋ كەزٸندە بٸرٸنشٸ بولىپ سٶز العان ايماق باسشىسى بىلعارى قولعاپ شەبەرٸ بەكزات نۇردەۋلەتوۆكە بارلىق ماڭعىستاۋلىقتاردىڭ اتىنان العىس ايتىپ, شىن جٷرەكتەن ريزاشىلىعىن بٸلدٸردٸ.
«تٶبەمٸز كٶككە جەتكەندەي بولدى, قۋانىشىمىز قۇتتى بولسىن! ەرينە, ماڭعىستاۋدىڭ مەرەيٸن اسىرىپ, مەرتەبەسٸن اسقاقتاتقان سپورت ساڭلاقتارىمىز بار. بٸراق, ونىڭ ٸشٸندە بەكزاتتىڭ ورنى ەرەكشە. ەر قارسىلاسىن ايقىن باسىمدىقپەن جەڭدٸ. ونىڭ ٸشٸندە كۋبالىقتى جەڭگەنٸ تٸپتٸ كەرەمەت»,-دەدٸ سەرٸكباي ترۇموۆ.
بەكزات نۇردەۋلەتوۆ قارسى الۋعا كەلگەن بارلىق جانكٷيەرلەر مەن ٶڭٸر باسشىسىنا ريزاشىلىعىن بٸلدٸرٸپ, «بۇل جەڭٸستٸ بارلىق قازاقستاندىقتارعا ارنايمىن» دەدٸ.
ايتا كەتەيٸك, بەكزاد نۇردەۋلەتوۆ 81 كگ سالماقتا اقتىق فينالعا جولداما الىپ, كەيٸن فينالدا جەڭٸسكە جەتكەن بولاتىن.
