بيىل «ۆولونتەرلٸك تۋرالى» زاڭ جوباسى ەزٸرلەنەدٸ. بۇل تۋرالى بٷگٸن قر اقپارات جەنە قوعامدىق دامۋ مينيسترلٸگٸنٸڭ كەڭەيتٸلگەن القا وتىرىسىندا ۆەدومستۆو باسشىسى دەۋرەن اباەۆ ايتتى, – دەپ حابارلايدى قازاقپارات.
«ازاماتتىق قوعام سالاسىنداعى نەگٸزگٸ شارالارعا توقتالۋعا رۇقسات ەتٸڭٸزدەر. ەڭ الدىمەن بۇل – ۆولەنتەر جىلى. 7 باعىتتى قامتيتىن ٸس-شارالار جوسپارى بەكٸتٸلگەن. ولار: بالالار ٷيلەرٸندەگٸ بالالاردى قامقورلىققا الۋ, ناۋقاستاردى قاراۋعا كٶمەك كٶرسەتۋ, قورشاعان ورتانى قورعاۋ, ٶزەندەر مەن ورمانداردى تازالاۋ, قارتتار ٷيلەرٸندە ەرٸكتٸلەردٸڭ جۇمىسى, اۋىل مەكتەپتەرٸنٸڭ جوعارى سىنىپ وقۋشىلارىنا كٶمەكتەسۋ, سونىمەن قاتار ەكٸنشٸ دٷنيەجٷزٸلٸك سوعىستاعى جەڭٸستٸڭ 75 جىلدىعىنا ارنالعان جۇمىستار. وسى جىلدىڭ سوڭىنا دەيٸن «ۆولەنتەرلٸك تۋرالى« زاڭ جوباسىن ەزٸرلەۋگە دە نازار اۋدارتقىم كەلەدٸ», - دەدٸ مينيستر.
سونىمەن قاتار ول ەلٸمٸزدٸڭ بارلىق ٷكٸمەتتٸك ەمەس ۇيىمدارىن IX قازاقستاننىڭ ازاماتتىق فورۋمىنا بەلسەندٸ تٷردە قاتىسۋعا شاقىردى.
«EXPO بازاسىندا Art Hub كرەاتيۆتٸك كاپيتال ورتالىعىنىڭ الاڭىندا رەسپۋبليكالىق ۆولەنتەرلٸك فرونت-كەڭسە اشۋ جوسپارلانىپ وتىر. وسى سالاعا جەتەكشٸلٸك ەتەتٸن ۆيتسە-مينيستر ازاماتتىق قوعام سالاسىنداعى مٸندەتتەردٸڭ ورىندالۋىن باقىلاۋعا الۋى قاجەت», - دەدٸ دەۋرەن اباەۆ.
