سىبايلاس جەمقورلىققا قارسى ٸس-قيمىل اگەنتتٸگٸنٸڭ تٶراعاسى ولجاس بەكتەنوۆ ورتالىق اپپارات پەن اۋماقتىق ورگانداردىڭ جەكە قۇرامىمەن كەڭەس ٶتكٸزدٸ, دەپ حابارلايدى "ۇلت اقپارات" ۆەدومستۆونىڭ باسپاسٶز قىزمەتٸنە سٸلتەمە جاساپ.
جيىندا ٷكٸمەتتٸڭ كەڭەيتٸلگەن وتىرىسى بارىسىندا مەملەكەت باسشىسىنىڭ بەرگەن تاپسىرمالارىن ٸسكە اسىرۋ مەسەلەلەرٸ تالقىلاندى.
«پرەزيدەنت مەملەكەتتٸك ورگانداردىڭ ەلدٸڭ ورنىقتى ەلەۋمەتتٸك-ەكونوميكالىق دامۋىن قامتاماسىز ەتۋ جەنە حالىقتىڭ ەل-اۋقاتىن ارتتىرۋ جٶنٸندەگٸ تيٸمدٸ جۇمىسىنىڭ جەتكٸلٸكسٸزدٸگٸنە بايلانىستى قاتاڭ سىن ايتتى. مەملەكەت باسشىسى ايتقان كەمشٸلٸكتەردٸڭ بٸرٸ – جەمقورلىق», - دەدٸ بەكتەنوۆ.
انتيكور باسشىسى بارلىق بٶلٸمشە باسشىلارىنا جول قۇرىلىسى مەسەلەسٸ بويىنشا دەرەۋ ەگجەي-تەگجەيلٸ اقپارات بەرۋدٸ تاپسىردى.
«بٸز بارلىق ٸرٸ مەردٸگەرلەردٸ جەنە ولاردىڭ ارتىندا تۇرعانداردى بٸلەمٸز. رەسپۋبليكالىق جەنە جەرگٸلٸكتٸ جولداردى سالۋ كەزٸندە انىق قاتەلٸكتەر تۋرالى اقپارات بار. باسقا مەملەكەتتٸك ورگاندارمەن بٸرلەسٸپ بۇل مەسەلەدە تەرتٸپ ورناتامىز. بۇل رەتتە ادال بيزنەستٸڭ جۇمىسىنا ارالاسۋعا جول بەرۋگە بولمايدى», - دەپ اتاپ ٶتتٸ بەكتەنوۆ.
سونداي-اق, مەملەكەت باسشىسىنىڭ باعا بەلگٸلەۋدٸ باقىلاۋ, بٸلٸم بەرۋ جەنە دەنساۋلىق ساقتاۋ سالالارىندا جاڭا ۇلتتىق جوبالاردى ەزٸرلەۋ مەسەلەلەرٸنە قاتىستى تاپسىرمالارى تالقىلاندى.
