الماتىنىڭ باس سانيتارلىق دەرٸگەرٸ جانداربەك بەكشين «Ritz Carlton» قوناقٷيٸندە 150 ادامعا ارنالعان ٸس-شاراعا نە ٷشٸن رۇقسات بەرگەنٸن تٷسٸندٸردٸ, دەپ حابارلايدى "ۇلت اقپارات".
ونىڭ ايتۋىنشا, رۇقسات بانكەتكە ەمەس, پەرسونالدى وقىتۋعا بەرٸلگەن.
«ولار قازٸر ۇزاق ۋاقىت ٷزٸلٸستەن سوڭ قىزمەتكەرلەردٸ قايتادان جيناپ جاتىر. سپورتشىلارعا قۇرمەت كٶرسەتۋ شاراسى بٸرٸنشٸ قاباتتا 1 رەت قانا ٶتۋٸ تيٸس بولاتىن. الايدا, بٶلٸم باسشىسىنىڭ كٶرسەتكەن اقپاراتىندا بٸررەتتٸك شارا ەكەندٸگٸ كٶرسەتٸلمەگەن», - دەدٸ بەكشين.
باس سانيتارلىق دەرٸگەردٸڭ سٶزٸنشە, مونيتورينگٸلٸك توپتار قۇقىقبۇزۋشىلىق تۋرالى حابارلاماعان.
«ول جەردە قانشا ادام بولعانى دا بەلگٸسٸز. بٸرەۋلەر 40 ادام دەسە, بٸرەۋلەر 60 ادام دەيدٸ. بۇل قوناقٷيدە جوعارعى قاباتتا كەڭ كٶلەمدە بانكەت ٶتكٸزەتٸن بٶلمەلەر جوق. قوناقٷي باسشىلىعى ٶتە اۋقىمدى زارارسىزداندىرۋ شارالارىن جٷرگٸزدٸ. اۋانى رەتسيرككۋلياتورلى تازارتۋ جٷيەسٸن ورناتىپ, اۋا الماسۋ جٷيەسٸن جاقسارتتى. باكتەريتسيدتٸ لامپالار قويىلدى. وسى قاۋٸپسٸزدٸك شارالارىنا 1 ملن دوللارعا جۋىق قاراجات كەتكەن. سول ٷشٸن بٸز بۇل شاراعا رۇقسات بەردٸك. 900 ورىندىق زالعا تەك 150 ادامعا رۇقسات ەتتٸك», - دەدٸ بەكشين.
