9 مامىر - جەڭٸس كٷنٸ. قاسٸرەتكە تولى جىلدار تاريح قويناۋىندا قالدى. ەلدٸڭ ازاتتىعى, ۇرپاقتىڭ جارقىن بولاشاعى ٷشٸن قانىن تٶككە بابالارىمىزدىڭ ەرلٸگٸ ۇمىتىلماق ەمەس.
ەكٸنشٸ دٷنيەجٷزٸلٸك سوعىس كەزٸندە باتىرلىعىمەن, ەرلٸكتەرٸمەن ەل ەسٸندە قالعان الىپتار شوعىرىنىڭ بٸرٸ ھەم بٸرەگەيٸ - باۋىرجان مومىشۇلى. اتاۋلى كٷنگە وراي باۋىرجان باتىرعا ارنالعان ٶلەڭدەر توپتاماسىن ەزٸرلەگەن ەدٸك. ەرلەرٸمٸز مەڭگٸلٸك ەل ەسٸندە!
باۋىرجان
بٸر داۋىل ساپىردى كەپ ٶرت تەڭٸزٸن,
تەڭسەلتٸپ تەمٸر توپان دٷنيە جٷزٸن.
بەتٸنە تۋعان جەردٸڭ ٶشپەستەي عىپ,
ەر جازدى ٶز قانىمەن جٷرگەن ٸزٸن.
ناق سول كەز ەستٸدٸم مەن ەر دٷبٸرٸن,
اتاعى اتىن الىپ كەلدٸ بۇرىن.
ٷستٸندە تۋعان ەلدٸڭ تۇردى تولقىپ,
«باۋىرجان مومىشۇلى» دەگەن بٸر ٷن.
اقىننىڭ اق سۇڭقارداي جٷرەگٸ بار,
القىندىم بٸر كٶرۋگە بولىپ قۇمار.
كٶكتەمدە كٷركٸرەگەن كٷن داۋسىن
جەر ەستٸپ, جەلكٸلدەگەن گٷل ىنتىزار.
قان مايدان قاتالاتىپ, شٶلدەگەندە,
كەز بولدىم جالتىلداعان ەكٸ كٶلگە.
كٶل ەمەس كٶزدەرٸ عوي باۋىرجاننىڭ,
ەلەستەپ مىڭ كٶرٸنەر بٸر كٶرگەنگە.
بويى بار بٸزدەن گٶرٸ بيٸگٸرەك,
تٸپ-تٸك بوپ ابىرويىن تۇرعان تٸرەپ.
توپ جارا كٶرٸنسٸن دەپ ەكٸ يىعى,
تۋعان ەل جاراتىپتى ونى ٸرٸرەك.
ويى بار بٸردە داۋىل, بٸردە جالىن,
تەڭٸزدەي تەبٸرەنتكەن تەرەڭ جانىن.
العانداي بويعا جيىپ بار قۋاتىن,
كەشەگٸ ٶزٸ كەشكەن ۋاقيعانىڭ.
كەيدە ول كٶك سەمسەرلٸ گەنەرالداي,
كەيدە ول كٷي كٶڭٸلدٸ اقىن جانداي.
ٶمٸردٸڭ ول شەتٸ مەن بۇل شەتٸنە
ٶرەسٸ ٶرەن ويدىڭ تارتىلعانداي.
جان ۇقپاس جۇمباق ەمەس بٸر جاسىرىن,
ايتادى ول تٸكە قاراپ جۇرتقا سىرىن.
جاراتپاس جاماپ-جاسقاپ جۇرت ەسكٸسٸن,
سوعادى ٶز دٷكەنٸ سٶز اسىلىن.
ويى بار قييالىنىڭ قاناتىندا,
اداسپاس اپارىپ بٸر سالساڭ تىڭعا...
بٸر دەۋرەن ويناپ-كٷلٸپ وتىرعانى,
جالتىلداپ ەكٸ كٶزٸ قارسى الدىڭدا.
«باتىرىم - باۋىرجانىم» دەيدٸ حالقىم,
الىپ ۇش,اقىن جٷرەك ەردٸڭ داڭقىن.
كەلەشەك كەلە جاتىر كٶرەمٸن دەپ,
تٸك باسىپ تۋعان جەردە جٷرگەن قالپىن.
اعامىز اتاعىنا اسقار تاۋ تەڭ,
جاۋ كەلسە – جاۋبٷيرەكتەي ەتەر جەۋكەم,
ەمەندەي ەرەگٸسەر سۇراپىلمەن,
باسىمەن بۇلتتى جايپاپ بٸزدٸڭ باۋكەن!
1948 جىل
قاسىم امانجولوۆ
***
باۋىرجان مومىشۇلىنا
اعا,
ساعان, بٸلمەيمٸن نە ايتارىمدى,
قاي قىرىڭنان بٸلمەيمٸن بايقارىمدى.
كٶڭٸلدەگٸ وي كٶمەيگە كەپتەلدٸ دە,
تٷرمەسٸنە كەۋدەمنٸڭ قايتارىلدى.
قايتەرٸمدٸ, بٸلمەيمٸن نە ايتارىمدى?
جاسقانۋدى بٸلمەۋشٸ ەم, جالتارۋدى,
نەگە كٶڭٸل, بٸلمەيمٸن, اڭتارىلدى?!
اق تۇلپارىم بار ەدٸ ساعان دەگەن
الىپ ۇشپاي ول نەگە قاڭتارىلدى?!
سەن زەرۋ ەمەسسٸڭ عوي قۇرمەتكە,
(سىرلى اياقتىڭ سىنى بار, سىرى كەتكەن...)
تونعا ەمەس, ورامال جولعا جاراپ,
سىي تارتۋدى اتامىز ىرىم ەتكەن.
تارتار سىيىم ٶزٸڭە بولماعاسىن,
بەلگٸلٸ عوي قاسىڭا جولاماسىم.
اق سۇنكارىم بار ەدٸ, ۇشپاي قويدى,
السام-داعى باسىنان توماعاسىن.
قىلىشىمدى سۋىرىپ قىنابىنان,
قىل قاپقان جٷزٸن كٶرٸپ, جىلادىم-اۋ...
جەتٸمدەردٸڭ كەگٸ مەن جەسٸرلەردٸڭ
سۋارىپ ەم سۋالعان بۇلاعىنا.
قايراپ ەدٸم زاۋالدىڭ شارىعىنا,
قاقتاپ ەدٸم قان مايدان جالىنىنا.
قىنابىنا ونى دا جاسىردىم مەن,
كەرەك بولىپ جٷرەر دەپ حالىعىما.
قىنابىنا ساپ قويدىم ٷمٸتپەنەن,
ونىڭ نەسٸن جاسىرام بٷگٸن سەنەن.
ساعان, اعا, ساقتالعان بٸر سىي بار-اۋ,
نازارىنا ەشكٸمنٸڭ ٸلٸكپەگەن.
التىن دا, الماس تا ەمەس جالتىلداعان,
بٸر سىي بار, اعا, ساعان, تارتىلماعان!
ۇرپاقتار اڭىز ەتٸپ ايتا جٷرەر,
سىيدان دا ون ەسە ارتىق داڭقىڭ ماعان.
ەشكٸمنٸڭ نازارىنا ٸلٸكپەگەن,
ساعان بٸر سىي تارتام دەپ ٷمٸتتەنەم.
جٷرەگٸمنٸڭ تاپسىرعان اماناتىن
بەرە الماي كەتەم بە دەپ كٷدٸكتەنەم.
قانداي سىي تارتسام ەكەن, اعا ساعان,
(بٸلمەيمٸن, جاراسپاي ما, جاراسا ما?!)
ەشبٸر سىي تابا الماسام, اعا ساعان
اپپاق تونىن — اتامنىڭ تەبەرٸگٸن,
جٷزگە كەل دەپ ارقاڭا جابا سالام.
مۇقاعالي ماقاتاەۆ
***
«سوۆەتتٸڭ سانالى ەر ەركەگٸ» دەپ,
«جٸگٸتتٸڭ قىز قىزىعار كٶركەمٸ» دەپ,
باۋىرجان مومىشۇلى جەر جٷزٸندە
تاراپتى بارلىق ەلگە ەرتەگٸ بوپ.
بارسام دا قاي كونتينەنت, قاي ارالعا,
زاماننان از حابارى بار ادامدا
بٸلمەيتٸن باۋىرجاندى جان كٶرگەم جوك,
مەن بۇعان قۋانام دا, تاڭدانام دا.
ايتايىن ەڭ الدىمەن قۋانىشتى:
قازاقتا ۇل تۋعانمەن تالاي كٷشتٸ,
جەر جٷزٸن تامساندىرىپ باۋىرجانداي
ەسٸمٸ قايسىسىنىڭ حاتقا تٷستٸ?
اۋىلدىڭ قالدى كٶبٸ اۋماعىندا...
باۋىرجان «كاتيۋشاداي» لاۋلادى دا,
ٶرتەدٸ فاشيستەردٸ, سوندىقتان دا
تانيدى دوسى تٷگٸل جاۋ جاعى دا.
باتىستا, جٷرگەن عىلىم تەرەڭٸندە,
اقىلىن, ٶجەتتٸگٸن, ٶنەرٸن دە
جىر ەتٸپ, باۋىرجاننىڭ باتىرلىعىن
تانيدى, بٸر-اق شىندىق كٶلەمٸندە.
ەجەلدەن ەرتەگٸشٸل شىعىس - كەرٸ,
شىندىقتان شىعا شىرقاپ, كەتەدٸ ەرٸ:
كٶرەدٸ قاھارمانداي تاۋ كٶتەرگەن,
نەمەسە, جەر تٸتٸرتكەن ەزٸرەت-ەلٸ.
بٸلسە ەگەر ەكەنٸمدٸ مەنٸڭ قازاق:
«سەندەردە ۇل بار عوي, - دەپ, - سونداي عاجاپ?»
شۋلاسىپ قاماعاندا قالىڭ ادام,
جارىلماي قۋانىشتان تۇرام از-اق!
ايتايىن تاندانۋدىڭ ەندٸ جايىن:
ۇشقانىن اتاق-داڭكى كٶرگەن سايىن.
كەلتٸرەم كٶز الدىما باۋىرجاندى,
كەدٸمگٸ جاقسى ادامدى - قاراپايىم.
بٸلەمٸن بۇل جٸگٸتتٸ ەرتە كٷننەن:
قاتتىنى نەلەر كەرٸم ەرٸتە بٸلگەن.
شىقتى بۇل قىلىش بولىپ مايرىلمايتىن,
سوۆەتتٸك ارمييانىڭ مارتەنٸنەن.
شىقتى دا جالاڭ قاعىپ تۇردى ساپقا...
وتاندىق ۇلى سوعىس قىزعان شاقتا,
اقىلى, قيمىلىمەن, قايراتىمەن,
ٶزٸنە يە بولدى بەرگەن اتقا.
سول ٷشٸن وتان مەن حالقى سٷيٸپ,
اتاسا كەتەتۇعىن دەنەسٸ يٸپ,
تاريحقا كٸردٸ بۇل دا دەل زوياداي,
نەمەسە سەكٸلدەنٸپ - مەرەسەۆ.
فاشيستٸ بۇل باتىرلار قىرىپ-جويدى,
ازامات بولدى ٸستەرٸ ابىرويلى.
قۇرمەتپەن, سوندىقتان دا, باۋىرجانعا
جاتىرمىز الپىس جاستا جاساپ تويدى.
شاشۋىم وسى-اق بولدى تويعا دايىن.
ەل سٷيگەن ەردٸ مەن دە ايمالايىن!
باۋىرجان, اتا-اناڭا العىس ايتىپ,
سوۆەتتەن سەنٸ ٶسٸرگەن اينالايىن!
سەبيت مۇقانوۆ
***
باتىردىڭ تۇلعاسى
(گۆاردييا پولكوۆنيگٸ باۋىرجان مومىشۇلىنا)
بۇلىڭ-بۇلىڭ بەلەڭدە,
بۇلدىراعان كٶك ورمان
بۇلتتى اسپان تٶبەڭدە
كٶكجيەككە ورالعان.
كٶز الدىمدا تۇرعانداي
حوش ايتىپ, قول العانىڭ.
باتىر كٶردٸم تۇلعاڭنان
پارلاعان ەل ارمانىن.
قىسى, جازى جاسارعان
قاراعايداي مٷسٸندٸ,
حالقىڭ ٷشٸن جاساعان,
كٶردٸم باتىر سۇسىڭدى.
قولىڭدى الدىم قۇرمەتپەن
تٸك قاراۋعا باتا الماي,
جانىڭ قيىپ كٷزەتكەن
كٶرٸندٸڭ كەڭ جاپانداي.
سونى تالماي قورعاۋعا
قالا بەردٸڭ سەن تۇرىپ.
مەن اتتاندىم تولعاۋعا
كەۋدەمدٸ ويعا تولتىرىپ.
كٶكەيٸمدە ساقتالار,
سەۋلەم, سول بٸر تۇرىسىڭ.
اعاڭ ايتىپ ماقتانار
سەندەي باتىر ٸنٸسٸن.
قۋات تۇتىپ قاراڭدى,
قۋانىشپەن قايتارمىن.
ماقتان قىل دەپ بالاڭدى
تۋعان ەلگە دە ايتارمىن.
قاليجان بەكقوجين
***
توماعا كيگەن تاۋ بٷركٸت
(باۋىرجان مومىشۇلىنا)
توماعا كيگەن تاۋ بٷركٸت
قادايدى كٶزٸن قۇزدارعا.
سوندا بٸر شىڭدى جاڭعىرتىپ
ساڭقىلداپ ۇشقىن مۇز-قاردا.
سابالاپ سوندا قاناتىن,
قيقۋلايتىن داۋىلدا;
شٷيٸلسە بۇعىپ قالاتىن
اڭ دا, قۇس تا, تاۋىڭ دا.
ەندٸ ماڭى تىپ-تىنىش
جوق داۋىل دا, تىقىر دا.
وتىر تارلان سۇستى قۇس
توپشىسىن بٷگٸپ تۇعىردا.
مٷمكٸن قالعان ٸز بار ما
قۇزعىندا قارلى قييانىڭ? –
قارايدى قىران قۇزدارعا
قييالار تەربەپ قييالىن...
عالي ورمانوۆ
***
باۋىرجان مومىشۇلىمەن قوشتاسۋ
ايتشى,
قايىستى ما قابىرعاڭ?
قالاي ەكەن حاس باتىردان ايىرىلعان?!
قايىستى ما قابىرعاڭ,
قالاي ەكەن ايىرىلعان –
دٷبٸرلەگەن دابىلدان,
دەۋٸرلەگەن ايبىننان.
نامىستانسا – نايزاعاي,
نايزاعايى جاي بۋعان.
ەركەلەسە ەلٸنە,
قۇلاشى كەڭ جايىلعان.
تەك دۇشپانعا وق اتقان,
دوستارى ٷشٸن وي قۋعان.
قارا نٶسەر ٷيٸرٸپ,
قۇيىپ-قۇيىپ الاتىن.
نۋ ورمانداي بۇيىعىپ,
كٷرت تٷيٸلٸپ قالاتىن.
وت پەن سۋدان جارالعان,
وتانى ٷشٸن جاناتىن,
بٸراق امان قالاتىن,
بيٸك شىڭعا قاناتىن
وت جالاتىپ قاعاتىن.
سوعىس سالعان جاراسىن,
جولبارىستاي جالايتىن.
الدارقاتىپ ساناسىن,
جازىلعانعا سانايتىن.
ول – سولداتى سانانىڭ,
ول – سولداتتىڭ سەرٸسٸ,
ٶرٸسٸ مەن جەڭٸسٸ,
شەگٸنٸسٸ, ەڭٸسٸ,
تەگٸ مەنەن تەڭ ٸسٸ
بولدى باقىت ەلٸ ٷشٸن.
ول سەن ٷشٸن,
مەن ٷشٸن,
ارنادى بار جەڭٸسٸن.
جانارىندا سٶنٸپ بٸتپەي, جانىپ كەتكەن مۇڭى بار,
اق قاعازعا جازىپ بٸتپەي, الىپ كەتكەن سىرى بار,
ارمانى بار ەر ٷشٸن,
ايتشى, حالقىم,
قايىستى ما قابىرعاڭ,
قالاي ەكەن حاس باتىردان ايىرىلعان?
ايتشى, حالقىم, ايتشى, حالقىم,
جارىلشى بٸر اعىڭنان
باتىر تۋعان حالىقپىز عوي تۇلپارلاردىڭ جالىندا,
باتىر تۋعان حالىقپىز عوي رەۆوليۋتسييا – دابىلدا,
باتىر تۋعان حالىقپىز عوي وتتتا, سۋدا, داۋىلدا,
وت-جالىندى مايداندار مەن بەيبٸت كٷننٸڭ بابىندا.
ايتشى, حالقىم,
باۋىرجانىڭ – باۋىر ەتٸڭ, باتىرىڭ ەد –
ول قانداي,
ورنى قانداي جٷرەگٸڭدە,
كەيپٸ قانداي كەلەشەككە قالعانداي?
كەلەر عاسىر كەلبەتٸنە, قارار ما ەكەن تاڭدانىپ,
مىلتىق اتقان سوڭعى كومبات... اڭىز بولىپ قالعانداي.
مىلتىق اتقان سوڭعى كومبات,
سوعىس كٶرگەن سوڭعى سولدات,
اڭىز بولىپ قالا ما?!
سول اڭىزدىڭ باس باتىرى – باۋىرجانداي باۋىر ەتٸڭ
بولا ما?!
ايتشى, حالقىم,
ەندٸ سوعىس بولمايتىنى راس قوي,
ەندٸ راس قوي – اتىسپايمىز وكوپتار مەن وبادا,
ەندٸ راس قوي,
باۋىرجان دا ەكٸنشٸ رەت تۋماسى,
ەلدەن اڭىز... باۋىرجاننىڭ تۋمىسى مەن تۇلعاسى.
مۋزەي مٷلكٸ كٷنٸ ەرتەڭ-اق –
باۋىرجاننىڭ قىلىش سالعان قىنابى
ەرتەڭ ەلەس – ۆولوكولام تاس جولى مەن جۋالىنىڭ
جىلعاسى
سوعىس – شىندىق,
جەڭٸس – شىندىق,
ەرلٸك – شىندىق, ەندەشە,
ەرلٸك جاساۋ مٷمكٸن ەمەس ەر ەلٸنە سەنبەسە.
ايتشى, حالقىم, كٷنٸ ەرتەڭ-اق كەلەر ۇرپاق ساعىنباي ما
باۋكەڭدٸ
شىندىق – ەرلٸك, ەرلٸك – شىندىق شٶلٸركەتسە, شٶلدەسە.
كەڭشٸلٸك مىرزابەكوۆ
***
جەڭٸلٸپ تۇرىپ جەڭٸلمەۋ
نەمەسە
باۋىرجان مومىشۇلىنىڭ كەشٸرٸم سۇراۋى
مەن ول كەزدە ەر ادىمىن ەركٸن, باتىل باساتىن,
ايتقانىنان قايتپايتۇعىن, ەدٸم قايسار جاس اقىن.
ٶز نەگٸزٸن العان ادام سيياقتانعان داۋىلدان,
بٸردە ماعان حابارلاستى مومىشۇلى باۋىرجان.
سەنٸ كەتكەن تۋعان تٸلدە تاۋسىلعانداي وي كەنٸ,
بٸراز ۋاقىت تەلەفوندا ول تەك ورىسشا سٶيلەدٸ.
– كەشٸرٸڭٸز, – دەدٸم وعان – ۇلتسىز قازاق پارىقسىز,
مەنٸ ورىس ادامىمەن شاتاستىرىپ الىپسىز?
– جو-جوق – دەدٸ ول, – ٷنٸڭ سەنٸڭ نەگە ىزعارلى, نەگە توڭ,
مەن جاس اقىن شاحانوۆقا سوعىپ تۇرمىن تەلەفون!
– ال, شاحانوۆ سٸزشە قالاي, اينالعان با, ورىسقا,
ەلدە ورىس تٸلدٸلەرمەن تٷسكەن جان با جارىسقا? –
دەدٸم تاعى قىزىنىپ,
قازاقتىڭ نار پەرزەنتٸنە كٶڭٸلٸم كٷرت بۇزىلىپ. –
سٸز ەرقاشان ەلٸمٸزدە ۇلتتىق مٷددە دەگەندە,
دارا تۇلعا بولاتىنسىز شىعار دارا كەمەرگە.
جان ەمەسسٸز پايىمسىزدىق جەڭە الاتىن اقىلىن,
سوندىقتان دا مۇنىڭىزدى تٷسٸنبەدٸم, باتىرىم.
سٶزٸڭٸز بەن ٸسٸڭٸزدٸڭ اراسى –
بٷگٸن نەگە ەكٸ جارىم شاقىرىم? –
دەپ تەلەفون ترۋبكاسىن ىزبارلانا تاستادىم.
ۋاقىت ٶتپەي قاس-قاعىم,
مەنٸڭ قايسار مٸنەزٸمە ٷندەمەي باس شايقاعان,
تەلەفونىم شىلدىرادى قايتادان.
– كەشٸر, مۇحتار, – دەدٸ باۋكەڭ – يتتٸگٸمە دەس بەرمە,
قانشاما جىل تەك ورىسشا سٶز قۇرادىق ەسكەردە.
بيلٸكتە دە ورىس رۋحتى ادامداردان كٷش كٶرۋ,
ولارمەنەن ارالاسۋ, رۋحسىزدىققا تٸستەنۋ,
تەك سول تٸلدە ەلگٸلەردەن ويلى, ويسىز ٸس كٶرۋ,
ورىسشا ويلاپ, ەر تٷن سايىن تەك ورىسشا تٷس كٶرۋ,
بٸز سورلىنى الىپ كەلدٸ ناق وسىنداي جاعدايعا,
ۇلتسىزدانعان قىزمەت تە ۇلت نامىسىن قورلايدى ە?
بٸر سەت دۇرىس اشپاعانعا ۇلتتىق مٷددە ەسٸگٸن,
بەدەلٸمدٸ بەس تيىن عىپ, سۇراپ تۇرمىن كەشٸرٸم.
كەشٸر مەنٸ, اينالايىن, ەندٸ مٷلدە ٶزگەرەم,
قازاقپەنەن تەك قازاقشا سٶيلەسۋگە سٶز بەرەم!
ايتتى – بٸتتٸ, ەش كٷش وعان بولا المايتىن بٶگەسٸن,
قازاقتىڭ ٶر ۇلى ادامى ورىندادى ٶز ۋەدەسٸن!
بۇل كٷندەرٸ بوي كٶتەرٸپ كەيبٸر ٶلكە, قالادان,
رۋحسىزعا نايزا ٸسپەتتٸ اتىلىپ,
جۇرتتى سانا بيٸگٸنە شاقىرىپ,
ەسكەرتكٸش بوپ شىرقاۋ كٶكتەن قول بۇلعاپ تۇر سول ادام...
....................................................................................................
يە, ۇلى تۇلعانىڭ دا وسال تۇسى بولادى.
قاتەلٸگٸن, بٸراق, باتىل مويىنداۋ,
قاتەلٸگٸن قاتال شىندىق بيٸگٸندە پايىمداۋ,
سول تۇلعانىڭ قايتالانباس جەڭٸسٸ بوپ قالادى.
مۇحتار شاحانوۆ
***
نايزاعايى نامىستىڭ
(كەڭەس وداعىنىڭ باتىرى, داڭقتى قولباسشى جەنە جازۋشى باۋىرجان مومىشۇلىنا ارناۋ)
قاراۋ قوعام كٶزٸ باردا باعاسىن,
بەرمەگەسٸن قالاي تاپسىن جاراسىم?
تٸرلٸگٸندە تەپەرٸشتٸ كٶپ كٶرگەن
جولبارىس ەڭ جالاپ ٶتكەن جاراسىن.
كٶكٸرەگٸڭە سالىپ قويعان ازالى وي,
الالاعان الاقولدىڭ ازابى-اي!
سودان بولار ارىستانداي اشۋلى,
جانارىڭنان جارقىلدايتىن ناجاعاي.
ٸشتارلىقپەن جالالى ويدى جاقتاعان,
تابانىڭمەن باستىرعانى-اي شوق قوعام.
شىعىستاعى شىراعى ەدٸڭ شىندىقتىڭ,
تۋرا ايتىپ تۋعانىنا جاقپاعان.
كٶپكە بارماي باقاي ەسەپ باتىلى,
قارا قۇلىپ سارت اشىلدى اقىرى.
بۇلت استىنان كٷن شىققانداي جارقىراپ,
شىعا كەلدٸ عاجاپ, قازاق باتىرى.
كٶڭٸلٸندە قىزعانشاقتىق كٷي تۇنىپ,
ٶكتەم ۇلتتىڭ ۇلتشىلاردى قيتىعىپ.
«باتىرلىقتى بەرگٸزبەيمٸز» دەگەن ٶڭ,
قاپتالىڭدا قالا بەردٸ يت ٷرٸپ.
ەر كٶڭٸلگە ورناعانداي جارىق كٷن,
كٷيٸن كەشكەن قىسقا قولدى عارٸپتٸڭ.
ونسىزداعى باتىرى ەدٸڭ باۋىرجان,
قازاق دەگەن كەڭ جٷرەكتٸ حالىقتىڭ.
قۇلاي سٷيگەن جۋسان يٸس دالاسىن,
سٷيٸپ ٶتكەن وتان اتتى اناسىن.
نامىسىمنىڭ نايزاعايى سەكٸلدٸ,
دارالاردىڭ ٸشٸندەگٸ داراسىڭ.
ەل ارمانى, ەل مۇڭىمەن اۋىرعان,
جارالعان جان بۇرق-سارق ەتكەن داۋىلدان.
قادٸرٸڭنٸڭ ارتىقتىعى سول شىعار,
جٷز قازاقتىڭ بەس التاۋى باۋىرجان.
دەمەۋ بولىپ, مەدەۋ بولىپ كٶڭٸلگە,
ٷن قوسقانداي زاماناۋي ٶر ٷنگە.
كيە دە مەن, يە دە مەن دەپ تۇرسىڭ,
اسقاق كەيٸپ استانانىڭ تٶرٸندە.
قاھارمانسىڭ, جان ەمەسسٸڭ شٷرەگەي,
مەندە اقىننىڭ بٸرٸ ەمەسپٸن جىرى ٶگەي.
مەڭگٸ جاسار كٶڭٸلدەردٸڭ تٶرٸندە,
باتىرلاردىڭ باتىرىسىڭ بٸرەگەي!
قۋاندىق شولاق
