فوتو نەيروندىق جەلٸ ارقىلى جاسالعان
باتىس قازاقستان وبلىسىندا 16 جاستاعى قىزدى زورلادى دەگەن كٷدٸككە ٸلٸنگەن 68 جاستاعى شەنەۋنٸك قاماۋعا الىندى. بۇعان دەيٸن قوعامدا ٷلكەن رەزونانس تۋدىرعان ٸس بويىنشا تەرگەۋ قايتا باستالىپ, كٷدٸكتٸ ۋاقىتشا ۇستاۋ يزولياتورىنا قامالدى, دەپ حابارلايدى Ult.kz Tengrinews.kz-كە سٸلتەمە جاساپ.
ۆەدومستۆونىڭ مەلٸمەتٸنشە, قىلمىستىق ٸس وبلىستىق پوليتسييا دەپارتامەنتٸ تەرگەۋ باسقارماسىنىڭ ٶندٸرٸسٸنە الىنعان.
"كەمەلەتكە تولماعان قىزدىڭ ەكەسٸ ايتقان قوسىمشا دەرەكتەر سوتقا دەيٸنگٸ تەرگەپ-تەكسەرۋ اياسىندا تەكسەرٸلدٸ. كٷدٸكتٸ قاماۋعا الىندى", – دەپ حابارلادى دەپارتامەنت ٶكٸلدەرٸ.
پوليتسييا بۇل ٸس وبلىستىق پوليتسييا دەپارتامەنتٸ باسشىلىعى مەن پروكۋراتۋرانىڭ ەرەكشە باقىلاۋىندا ەكەنٸن ايتتى. تەرگەۋ مٷددەسٸنە بايلانىستى ٶزگە اقپارات جارييالانبايدى.
بۇعان دەيٸن جەبٸرلەنۋشٸ قىزدىڭ ەكەسٸ باق-قا مەلٸمدەمە جاساپ, 68 جاستاعى شەنەۋنٸك ونىڭ 16 جاستاعى قىزىن الداپ ٷيٸنە شاقىرىپ, زورلىق ەرەكەتتەرٸن جاساعانىن ايتقان. سونداي-اق ول پوليتسييانىڭ ەرەكەتسٸزدٸگٸنە شاعىمدانىپ, كٷدٸكتٸنٸڭ باستاپقىدا ۇستالعانىمەن, كەيٸن بوساتىلعانىن جەنە تەرگەۋ ٶتە باياۋ جٷرگٸزٸلگەنٸن مەلٸمدەگەن.
ال باستاپقىدا ٶڭٸرلٸك پوليتسييا ٶكٸلدەرٸ تاراپتار اراسىندا "ٶزارا كەلٸسٸم بولعان" دەپ مەلٸمدەپ, تەلەفونداعى جازبالارعا سٸلتەمە جاساعان. سونداي-اق قىزدىڭ اناسى مەن جەبٸرلەنۋشٸنٸڭ ٶزٸ شاعىمدانۋدان باس تارتقانى ايتىلعان. الايدا بۇل وقيعا قوعامدا رەزونانس تۋدىرعاننان كەيٸن ٸسكە ٸشكٸ ٸستەر مينيسترلٸگٸ ارالاستى. مەجٸلٸستەگٸ بريفينگتە ٸشكٸ ٸستەر مينيسترٸنٸڭ ورىنباسارى سانجار ەدٸلوۆ ٸستٸ توقتاتۋ تۋرالى شەشٸمنٸڭ كٷشٸن جويىپ, تەرگەۋ قايتا باستالعانىن حابارلادى.
سونىمەن قاتار جۋرناليستەر ٸستٸ بۇرىن جاۋىپ, كٷدٸكتٸنٸ بوساتقان قىزمەتكەرلەردٸڭ تەرتٸپتٸك جاۋاپكەرشٸلٸگٸ مەسەلەسٸن كٶتەردٸ. ٸٸم نەگٸزگٸ سوتقا دەيٸنگٸ تەرگەۋ اياقتالعان سوڭ قىزمەتتٸك تەكسەرۋ جٷرگٸزۋ تۋرالى شەشٸم قابىلداناتىنىن مەلٸمدەدٸ.
