Foto neirondyq jeli arqyly jasalǵan
Batys Qazaqstan oblysynda 16 jastaǵy qyzdy zorlady degen kúdikke ilingen 68 jastaǵy sheneýnik qamaýǵa alyndy. Buǵan deiin qoǵamda úlken rezonans týdyrǵan is boiynsha tergeý qaita bastalyp, kúdikti ýaqytsha ustaý izoliatoryna qamaldy, dep habarlaidy Ult.kz Tengrinews.kz-ke silteme jasap.
Vedomstvonyń málimetinshe, qylmystyq is oblystyq politsiia departamenti tergeý basqarmasynyń óndirisine alynǵan.
"Kámeletke tolmaǵan qyzdyń ákesi aitqan qosymsha derekter sotqa deiingi tergep-tekserý aiasynda tekserildi. Kúdikti qamaýǵa alyndy", – dep habarlady departament ókilderi.
Politsiia bul is oblystyq politsiia departamenti basshylyǵy men prokýratýranyń erekshe baqylaýynda ekenin aitty. Tergeý múddesine bailanysty ózge aqparat jariialanbaidy.
Buǵan deiin jábirlenýshi qyzdyń ákesi BAQ-qa málimdeme jasap, 68 jastaǵy sheneýnik onyń 16 jastaǵy qyzyn aldap úiine shaqyryp, zorlyq áreketterin jasaǵanyn aitqan. Sondai-aq ol politsiianyń áreketsizdigine shaǵymdanyp, kúdiktiniń bastapqyda ustalǵanymen, keiin bosatylǵanyn jáne tergeý óte baiaý júrgizilgenin málimdegen.
Al bastapqyda óńirlik politsiia ókilderi taraptar arasynda "ózara kelisim bolǵan" dep málimdep, telefondaǵy jazbalarǵa silteme jasaǵan. Sondai-aq qyzdyń anasy men jábirlenýshiniń ózi shaǵymdanýdan bas tartqany aitylǵan. Alaida bul oqiǵa qoǵamda rezonans týdyrǵannan keiin iske Ishki ister ministrligi aralasty. Májilistegi brifingte ishki ister ministriniń orynbasary Sanjar Ádilov isti toqtatý týraly sheshimniń kúshin joiyp, tergeý qaita bastalǵanyn habarlady.
Sonymen qatar jýrnalister isti buryn jaýyp, kúdiktini bosatqan qyzmetkerlerdiń tártiptik jaýapkershiligi máselesin kóterdi. IIM negizgi sotqa deiingi tergeý aiaqtalǵan soń qyzmettik tekserý júrgizý týraly sheshim qabyldanatynyn málimdedi.
