فوتو: alash.kz
الماتىداعى «باعاناشىل» بالالار ٷيٸ تاعى دا قوعام نازارىندا. تۇرعىندار مەكەمە اۋماعىنداعى عيماراتتاردىڭ بٸرٸنٸڭ سٷرٸلٸپ, ەندٸ بٸرٸنٸڭ تەرەزەلەرٸ الىنىپ, قيراتىلا باستاعانىن بايقاعان, دەپ حابارلايدى Ult.kz Tengrinews.kz-كە سٸلتەمە جاساپ.
الماتى تۇرعىنى رەداكتسيياعا "باعاناشىل" بالالار ٷيٸنٸڭ اۋماعىنداعى عيمارات تٷسٸرٸلگەن بەينەجازبا جولدادى.
"مۇندا بەرٸن بۇزىپ تاستاعان. مىنا بٸر جاقسى عيماراتتىڭ تەرەزەلەرٸن الىپ تاستاپتى. ونى قيراتقان. ال مىنا شىرشالاردىڭ قاسىندا تاعى بٸر عيمارات بار ەدٸ – ول قازٸر جوق, سٷرٸپ تاستاپتى", - دەپ تٷسٸندٸرەدٸ ول كادر سىرتىندا.
الماتى قالالىق بٸلٸم باسقارماسى بۇل جاعدايعا قاتىستى تٷسٸنٸكتەمە بەردٸ. ۆەدومستۆو مەلٸمەتٸنشە, 2025 جىلعى 13 قازاندا قالالىق قۇرىلىس باسقارماسى مەن Integra Construction جشس اراسىندا جاڭا نىسان سالۋ بويىنشا مەموراندۋم جاسالعان.
تەحنيكالىق تەكسەرۋ نەتيجەسٸندە ەكٸمشٸلٸك, وقۋ كورپۋستارى, سپورت جەنە اكت زالدارىنىڭ عيماراتتارى سەيسميكالىق تۇرعىدا كٷشەيتۋگە جارامسىز دەپ تانىلىپ, ولاردى بۇزۋ تۋرالى شەشٸم قابىلدانعان. قازٸرگٸ ۋاقىتتا اتالعان نىسانداردى بٶلشەكتەۋ جۇمىستارى اياقتالعان.
جوبا اياسىندا جاتاقحانا كورپۋسىن قايتا جاڭعىرتۋ, سونداي-اق جاڭا وقۋ, سپورت, ەكٸمشٸلٸك عيماراتتار مەن اسحانا سالۋ جوسپارلانعان. قۇرىلىستى وسى جىلدىڭ تٶرتٸنشٸ توقسانىندا اياقتاۋ كٶزدەلٸپ وتىر.
ەكٸمدٸك مەلٸمەتٸنشە, بالالار ٷيٸنٸڭ تەربيەلەنۋشٸلەرٸ الماتىدان شىعارىلماعان. ولار ٶتكەن جىلدىڭ تامىز ايىنان بەرٸ ارناۋلى ەلەۋمەتتٸك قىزمەتتەرگە مۇقتاج بالالاردى قولداۋ ورتالىعىندا تۇرىپ جاتىر.
ايتا كەتەيٸك, بۇل مەكەمە بۇعان دەيٸن دە داۋ ورتاسىندا قالعان. 2024 جىلعى 21 شٸلدەدە تەربيەلەنۋشٸلەردٸ كٶشٸرۋ ەرەكەتٸ جانجالعا ۇلاسقان ەدٸ. بالالار اۆتوبۋستاردىڭ جولىن بٶگەپ, كٶشۋگە قارسىلىق بٸلدٸرگەن.
وقيعاعا پوليتسييا ارالاسىپ, قوعامدا ٷلكەن رەزونانس تۋدىرعان. بەينەجازبالاردا تەرتٸپ ساقشىلارىنىڭ بالالارعا دٶرەكٸ ەرەكەت كٶرسەتكەنٸ بايقالعان.
بۇل جاعدايعا پرەزيدەنت قاسىم-جومارت توقاەۆ ارالاسىپ, كٶشٸرۋ پروتسەسٸن توقتاتۋدى تاپسىرعان. كەيٸن ارنايى تەكسەرٸس جٷرگٸزٸلٸپ, جانجالعا بايلانىستى ٷش شەنەۋنٸك قىزمەتٸنەن بوساتىلعان.
