Foto: alash.kz
Almatydaǵy «Baǵanashyl» balalar úii taǵy da qoǵam nazarynda. Turǵyndar mekeme aýmaǵyndaǵy ǵimarattardyń biriniń súrilip, endi biriniń terezeleri alynyp, qiratyla bastaǵanyn baiqaǵan, dep habarlaidy Ult.kz Tengrinews.kz-ke silteme jasap.
Almaty turǵyny redaktsiiaǵa "Baǵanashyl" balalar úiiniń aýmaǵyndaǵy ǵimarat túsirilgen beinejazba joldady.
"Munda bárin buzyp tastaǵan. Myna bir jaqsy ǵimarattyń terezelerin alyp tastapty. Ony qiratqan. Al myna shyrshalardyń qasynda taǵy bir ǵimarat bar edi – ol qazir joq, súrip tastapty", - dep túsindiredi ol kadr syrtynda.
Almaty qalalyq Bilim basqarmasy bul jaǵdaiǵa qatysty túsinikteme berdi. Vedomstvo málimetinshe, 2025 jylǵy 13 qazanda qalalyq qurylys basqarmasy men Integra Construction JShS arasynda jańa nysan salý boiynsha memorandým jasalǵan.
Tehnikalyq tekserý nátijesinde ákimshilik, oqý korpýstary, sport jáne akt zaldarynyń ǵimarattary seismikalyq turǵyda kúsheitýge jaramsyz dep tanylyp, olardy buzý týraly sheshim qabyldanǵan. Qazirgi ýaqytta atalǵan nysandardy bólshekteý jumystary aiaqtalǵan.
Joba aiasynda jataqhana korpýsyn qaita jańǵyrtý, sondai-aq jańa oqý, sport, ákimshilik ǵimarattar men ashana salý josparlanǵan. Qurylysty osy jyldyń tórtinshi toqsanynda aiaqtaý kózdelip otyr.
Ákimdik málimetinshe, balalar úiiniń tárbielenýshileri Almatydan shyǵarylmaǵan. Olar ótken jyldyń tamyz aiynan beri arnaýly áleýmettik qyzmetterge muqtaj balalardy qoldaý ortalyǵynda turyp jatyr.
Aita keteiik, bul mekeme buǵan deiin de daý ortasynda qalǵan. 2024 jylǵy 21 shildede tárbielenýshilerdi kóshirý áreketi janjalǵa ulasqan edi. Balalar avtobýstardyń jolyn bógep, kóshýge qarsylyq bildirgen.
Oqiǵaǵa politsiia aralasyp, qoǵamda úlken rezonans týdyrǵan. Beinejazbalarda tártip saqshylarynyń balalarǵa dóreki áreket kórsetkeni baiqalǵan.
Bul jaǵdaiǵa Prezident Qasym-Jomart Toqaev aralasyp, kóshirý protsesin toqtatýdy tapsyrǵan. Keiin arnaiy tekseris júrgizilip, janjalǵa bailanysty úsh sheneýnik qyzmetinen bosatylǵan.
