«باقتى - اياگٶز» تەمٸرجولىنىڭ قۇرىلىسى كەلەسٸ جىلى اياقتالادى

فوتو: اشىق دەرەككٶز

اباي وبلىسىندا ستراتەگييالىق ماڭىزى بار «باقتى – اياگٶز» تەمٸرجول جوباسىنىڭ ٸسكە اسىرىلۋ بارىسى تالقىلاندى, دەپ حابارلايدى Ult.kz.

جۇمىس ساپارى اياسىندا جەنٸبەك تايجانوۆ اباي وبلىسىنا بارىپ, وبلىس ەكٸمٸنٸڭ ورىنباسارى سەرٸك تٶلەنبەرگەنوۆ قاتىسۋىمەن ارنايى كەڭەس ٶتكٸزدٸ. جيىن بارىسىندا تەمٸرجول قۇرىلىسىنىڭ قازٸرگٸ جاعدايى جەنە جوباعا قاتىسۋشى تاراپتاردىڭ جۇمىسىن ٷيلەستٸرۋ مەسەلەلەرٸ قارالدى.

كەڭەسكە قازاقستان تەمٸر جولى ۇلتتىق كومپانيياسىنىڭ, سامۇرىق-قازىنا قورىنىڭ ٶكٸلدەرٸ, سونداي-اق باس مەردٸگەر – China Harbour Engineering Company Ltd. كومپانيياسى مەن جوبالاۋشى ۇيىم ٶكٸلدەرٸ قاتىستى.

ستراتەگييالىق ماڭىزى بار جوبا

«باقتى – اياگٶز» تەمٸرجول جەلٸسٸ ەلدٸڭ كٶلٸك ينفراقۇرىلىمىن دامىتۋدا جەنە ترانسكاسپيي باعىتىنداعى ترانسقازاقستاندىق تەمٸرجول دەلٸزٸن قالىپتاستىرۋدا ماڭىزدى رٶل اتقارادى.

جوبانىڭ نەگٸزگٸ كٶرسەتكٸشتەرٸ:

• تەمٸرجولدىڭ جالپى ۇزىندىعى – 303 شاقىرىم;

• 11 بٶلەك پۋنكت سالۋ جوسپارلانعان;

• 68 كٶپٸر جەنە 355 سۋ ٶتكٸزۋ قۇبىرى تۇرعىزىلادى.

قۇرىلىس 2027 جىلى اياقتالادى

جوسپار بويىنشا تەمٸرجول قۇرىلىسى 2027 جىلدىڭ سوڭىنا دەيٸن اياقتالۋى تيٸس. قازٸرگٸ ۋاقىتتا ينجەنەرلٸك ٸزدەستٸرۋ جۇمىستارى تولىق اياقتالعان. سونىمەن قاتار اي, شولپان, ٷرجار جەنە باقتى ۋچاسكەلەرٸندە تٶرت ۆاحتالىق قالاشىق سالىنعان.

كٶلٸك ۆيتسە-مينيسترٸ جوبانى بەلگٸلەنگەن مەرزٸمدە ٸسكە اسىرۋدىڭ ماڭىزدىلىعىن اتاپ ٶتتٸ. ونىڭ ايتۋىنشا, قۇرىلىسقا قاتىسۋشى بارلىق تاراپ تيٸمدٸ ەرٸ ٷيلەسٸمدٸ جۇمىس ٸستەۋٸ قاجەت.

مينيسترلٸك مەلٸمەتٸنشە, جوبانىڭ جٷزەگە اسۋى قازاقستان تەمٸر جولى, مەردٸگەر ۇيىمدار جەنە جەرگٸلٸكتٸ اتقارۋشى ورگاندارمەن بٸرلەسٸپ تۇراقتى باقىلاۋدا.