بٸلٸم جەنە عىلىم مينيسترٸ اسحات ايماعامبەتوۆ شارىن شاتقالىنداعى قايعىلى وقيعا كەزٸندە قايتىس بولعان مۇعالٸم مەرەي يبراگيموۆتىڭ وتباسىنا باردى. بۇل تۋرالى بعم باسپاسٶز قىزمەتٸنٸڭ جەتەكشٸسٸ مٶلدٸر ەبدۋاليەۆا جەلٸدەگٸ پاراقشاسىندا جازدى, دەپ حابارلايدى "ۇلت اقپارات".
«ول مارقۇمنىڭ تۋعان-تۋىستارىنا كٶڭٸل ايتىپ, 26 جاستاعى پەداگوگتٸڭ اتا-اناسىنا ەرجٷرەك جەنە باتىر ەر ازاماتتى تەربيەلەگەنٸ ٷشٸن العىس ايتتى.
مەرەي يبراگيموۆ 29 مامىر سەل تاسقىنى ورىن العان كٷنٸ شارىن شاتقالىنا ەكسكۋرسيياعا بارعانداردىڭ قاتارىندا بولدى. جاس مۇعالٸم وقۋشىلاردى قۇتقارىپ قالۋ ٷشٸن ٶز ٶمٸرٸن قيدى», - دەلٸنگەن حابارلامادا.
ەستەرٸڭٸزگە سالا كەتسەك, 29 مامىر كٷنٸ الماتى وبلىسىنىڭ شارىن شاتقالىندا سەل جٷرٸپ, 2 ادام مەرت بولعانى, تاعى بٸرەۋٸنٸڭ ٸز-تٷزسٸز جوعالعانى حابارلانعان بولاتىن.
كەيٸن بٸلٸم جەنە عىلىم مينيسترلٸگٸ اتالعان وقيعا سالدارىنان 1 وقۋشى مەن 1 مۇعالٸمنٸڭ قازا تاپقانىن, تاعى بٸر وقۋشىنى ٸزدەۋ جۇمىسى جٷرگٸزٸلٸپ جاتقانىن مەلٸم ەتكەن ەدٸ.
«شارىن شاتقالى» قىزمەتكەرلەرٸ شارىن ٶزەنٸنٸڭ بويىن جاعالاي جەر بەتٸندە ٸزدەۋ-قۇتقارۋ جۇمىستارىن جٷرگٸزۋ بارىسىندا 30 مامىر تاڭعى ساعات 09:34-تە 11 جاستاعى قىز بالانى تاپتى.
ول شارىن ٶزەنٸنٸڭ سول جاعالاۋىندا وقيعا ورنىنان 3-4 شاقىرىم جەردەن تابىلعان.
الماتى قالالىق بٸلٸم باسقارماسى شارىن شاتقالىنا ەكسكۋرسييا مەكتەپ ەكٸمشٸلٸگٸمەن كەلٸسٸلمەگەنٸن جەتكٸزدٸ.
شارىندا وقۋشىلاردى قۇتقارۋ كەزٸندە قازا تاپقان مۇعالٸم «ەرلٸگٸ ٷشٸن» مەدالٸمەن ماراپاتتالدى.
