Bilim jáne ǵylym ministri Ashat Aimaǵambetov Sharyn shatqalyndaǵy qaiǵyly oqiǵa kezinde qaitys bolǵan muǵalim Merei Ibragimovtyń otbasyna bardy. Bul týraly BǴM baspasóz qyzmetiniń jetekshisi Móldir Ábdýalieva jelidegi paraqshasynda jazdy, dep habarlaidy "Ult aqparat".
«Ol marqumnyń týǵan-týystaryna kóńil aityp, 26 jastaǵy pedagogtiń ata-anasyna erjúrek jáne batyr er azamatty tárbielegeni úshin alǵys aitty.
Merei Ibragimov 29 mamyr sel tasqyny oryn alǵan kúni Sharyn shatqalyna ekskýrsiiaǵa barǵandardyń qatarynda boldy. Jas muǵalim oqýshylardy qutqaryp qalý úshin óz ómirin qidy», - delingen habarlamada.
Esterińizge sala ketsek, 29 mamyr kúni Almaty oblysynyń Sharyn shatqalynda sel júrip, 2 adam mert bolǵany, taǵy bireýiniń iz-túzsiz joǵalǵany habarlanǵan bolatyn.
Keiin Bilim jáne ǵylym ministrligi atalǵan oqiǵa saldarynan 1 oqýshy men 1 muǵalimniń qaza tapqanyn, taǵy bir oqýshyny izdeý jumysy júrgizilip jatqanyn málim etken edi.
«Sharyn shatqaly» qyzmetkerleri Sharyn ózeniniń boiyn jaǵalai jer betinde izdeý-qutqarý jumystaryn júrgizý barysynda 30 mamyr tańǵy saǵat 09:34-te 11 jastaǵy qyz balany tapty.
Ol Sharyn ózeniniń sol jaǵalaýynda oqiǵa ornynan 3-4 shaqyrym jerden tabylǵan.
Almaty qalalyq bilim basqarmasy Sharyn shatqalyna ekskýrsiia mektep ákimshiligimen kelisilmegenin jetkizdi.
Sharynda oqýshylardy qutqarý kezinde qaza tapqan muǵalim «Erligi úshin» medalimen marapattaldy.
