«قازاقستان بارىسى» دەۋرەن نۇرالينوۆ تۋىپ-ٶسكەن جەرٸ اياگٶزگە كەلدٸ. جەرلەستەرٸ بالۋاندى زور قوشەمەتپەن قارسى الدى, دەپ حابارلايدى "ۇلت اقپارات".
اياگٶز ٶڭٸرٸنٸڭ ماقتانىشى, «قازاقستان بارىسى» اتانعان جاس بالۋان دەۋرەن نۇرالينوۆتى حالىق ورتالىق الاڭدا كٷتٸپ الدى.
اقىندار ارناۋ ايتىپ, اۋدان باسشىسى سەيٸلبەك ىسقاقوۆ بالۋاننىڭ يىعىنا شاپان جاۋىپ, ات مٸنگٸزدٸ.
«اياگٶز - ەجەلدەن باتىرلار ەلٸ. بابالاردىڭ باتىلدىق پەن قايسارلىق رۋحىن جالعاعان دەۋرەن نۇرالينوۆ تەك وسى ەل مەن جەردٸڭ عانا ەمەس, كٷللٸ قازاقستاننىڭ ماقتانىشى», - دەپ اتاپ ٶتكەن ەكٸم سپورتشىعا اق باتاسىن بەرٸپ, قوشەمەت كٶرسەتتٸ.
«اياگٶز دەگەن - التىن بەسٸگٸم, تۋعان جەرٸم. اتالارىمىزدىڭ ارۋاقتارىنا قۇران باعىشتاپ, سٸزدەردٸڭ باتالارىڭىزدى الايىن دەپ ارنايى كەلدٸم. پەيٸلدەرٸڭٸزگە كٶپ راحمەت!. اياگٶزٸمٸز ەرقاشان جايناي بەرسٸن, باتىرلار شىعا بەرسٸن», - دەپ ريزاشىلىعىن بٸلدٸردٸ دەۋرەن نۇرالينوۆ.
ەسكە سالا كەتەيٸك, دەۋرەن نۇرالينوۆ 4 شٸلدە كٷنٸ استانادا ٶتكەن «قازاقستان بارىسى» تۋرنيرٸندە باس جٷلدەنٸ جەڭٸپ العان بولاتىن.
