فوتو: Polisia.kz
اتىراۋ وبلىسىنداعى جانگەلدين اۋىلىندا جوعالىپ كەتكەن تٶرت ادامعا قاتىستى قىلمىستىڭ مەن-جايى بەلگٸلٸ بولدى. تەرگەۋ بارىسىندا ولاردىڭ ۇزاق ۋاقىتقا سوزىلعان تۇرمىستىق جانجالدىڭ سالدارىنان ٶلتٸرٸلگەنٸ انىقتالعان, دەپ حابارلايدى Ult.kz Polisia.kz-كە سٸلتەمە جاساپ.
2025 جىلدىڭ جەلتوقسان ايىندا پوليتسيياعا 66 جاستاعى ەر ادام مەن 64 جاستاعى ەيەلدٸڭ, سونداي-اق ولاردىڭ بالالارى – 32 جاستاعى ۇلى مەن 35 جاستاعى قىزىنىڭ حابار-وشارسىز كەتكەنٸ تۋرالى حابارلاما تٷسكەن. تۋىستارىنىڭ ايتۋىنشا, وتباسى قاراشا ايىنان بەرٸ بايلانىسقا شىقپاعان. وسىدان كەيٸن تٶرتەۋٸ دە ٸز-تٷزسٸز جوعالعان ادامدار رەتٸندە ٸزدەۋگە جارييالانعان.
ٸس بويىنشا سوتقا دەيٸنگٸ تەرگەپ-تەكسەرۋ باستالىپ, ارنايى جەدەل-تەرگەۋ توبى قۇرىلعان. تەرگەۋ بارىسىندا 6 قاڭتار كٷنٸ ٷيدٸڭ شارۋاشىلىق قۇرىلىسىنىڭ ٸشٸنەن وتباسىنىڭ ەكەسٸ مەن اناسىنىڭ مەيٸتتەرٸ تابىلعان. كەيٸن قىلمىس ادام ٶلتٸرۋ فاكتٸسٸ بويىنشا قايتا سارالانىپ, جوعالعان بالالاردى ٸزدەۋ جۇمىستارى جالعاستىرىلعان.
قىلمىس جاسادى دەگەن كٷدٸكپەن وسى وتباسىنىڭ بۇرىنعى كٷيەۋ بالاسى – 29 جاستاعى ەر ادام حالىقارالىق ٸزدەۋگە جارييالانعان. سونىمەن قاتار ەرلٸ-زايىپتىلاردىڭ كٸشٸ قىزى دا ٸزدەۋگە بەرٸلگەن.
قر ٸٸم مەلٸمەتٸنشە, قازاقستاندىق پوليتسەيلەر يندونەزييا رەسپۋبليكاسىنداعى ەرٸپتەستەرٸمەن بٸرلەسٸپ, كٷدٸكتٸنٸ سول ەلدٸڭ ارالدارىنىڭ بٸرٸندە ۇستاعان. كەيٸن ول قازاقستانعا دەپورتاتسييالانىپ, ۋاقىتشا ۇستاۋ يزولياتورىنا قامالدى.
كٷدٸكتٸ ۇستالعاننان كەيٸن كٸنەسٸن مويىنداپ, ونىڭ كٶرسەتۋٸمەن قوسىمشا تەرگەۋ ەرەكەتتەرٸ جٷرگٸزٸلگەن. اتىراۋداعى ٷي اۋلاسىن تەكسەرۋ بارىسىندا بۇعان دەيٸن حابار-وشارسىز كەتكەن ۇل مەن قىزدىڭ مەيٸتتەرٸ دە تابىلعان.
تەرگەۋ دەرەكتەرٸنە سەيكەس, قىلمىسقا ۇزاق ۋاقىتقا سوزىلعان تۇرمىستىق جانجال سەبەپ بولعان. قازٸرگٸ ۋاقىتتا ٸس ەكٸ نەمەسە ودان دا كٶپ ادامدى ٶلتٸرۋ بابى بويىنشا تەرگەلٸپ جاتىر. تەرگەۋ جالعاسۋدا.
