Foto: Polisia.kz
Atyraý oblysyndaǵy Jangeldin aýylynda joǵalyp ketken tórt adamǵa qatysty qylmystyń mán-jaiy belgili boldy. Tergeý barysynda olardyń uzaq ýaqytqa sozylǵan turmystyq janjaldyń saldarynan óltirilgeni anyqtalǵan, dep habarlaidy Ult.kz Polisia.kz-ke silteme jasap.
2025 jyldyń jeltoqsan aiynda politsiiaǵa 66 jastaǵy er adam men 64 jastaǵy áieldiń, sondai-aq olardyń balalary – 32 jastaǵy uly men 35 jastaǵy qyzynyń habar-osharsyz ketkeni týraly habarlama túsken. Týystarynyń aitýynsha, otbasy qarasha aiynan beri bailanysqa shyqpaǵan. Osydan keiin tórteýi de iz-túzsiz joǵalǵan adamdar retinde izdeýge jariialanǵan.
Is boiynsha sotqa deiingi tergep-tekserý bastalyp, arnaiy jedel-tergeý toby qurylǵan. Tergeý barysynda 6 qańtar kúni úidiń sharýashylyq qurylysynyń ishinen otbasynyń ákesi men anasynyń máiitteri tabylǵan. Keiin qylmys adam óltirý faktisi boiynsha qaita saralanyp, joǵalǵan balalardy izdeý jumystary jalǵastyrylǵan.
Qylmys jasady degen kúdikpen osy otbasynyń burynǵy kúieý balasy – 29 jastaǵy er adam halyqaralyq izdeýge jariialanǵan. Sonymen qatar erli-zaiyptylardyń kishi qyzy da izdeýge berilgen.
QR IIM málimetinshe, qazaqstandyq politseiler Indoneziia Respýblikasyndaǵy áriptesterimen birlesip, kúdiktini sol eldiń araldarynyń birinde ustaǵan. Keiin ol Qazaqstanǵa deportatsiialanyp, ýaqytsha ustaý izoliatoryna qamaldy.
Kúdikti ustalǵannan keiin kinásin moiyndap, onyń kórsetýimen qosymsha tergeý áreketteri júrgizilgen. Atyraýdaǵy úi aýlasyn tekserý barysynda buǵan deiin habar-osharsyz ketken ul men qyzdyń máiitteri de tabylǵan.
Tergeý derekterine sáikes, qylmysqa uzaq ýaqytqa sozylǵan turmystyq janjal sebep bolǵan. Qazirgi ýaqytta is eki nemese odan da kóp adamdy óltirý baby boiynsha tergelip jatyr. Tergeý jalǵasýda.
