بٷگٸن اتىراۋ قالاسىنا كٸرٸپ-شىعۋ تولىقتاي شەكتەلدٸ, دەپ حابارلايدى "ۇلت اقپارات".
اتىراۋ قالاسىنىڭ پروكۋرورى ارشات تايتۋليننٸڭ حابارلاۋىنشا, كارانتين كەزٸندە قوعامدىق قاۋٸپسٸزدٸكتٸ قامتاماسىز ەتۋگە, سونداي-اق, قالا اۋماعىندا بەلگٸلەنگەن ۋاقىتشا شەكتەۋلەر تالابىن ساقتاۋ شاراسىنا 674 قىزمەتكەر, 68 اۆتوكٶلٸك جۇمىلدىرىلعان. ونىڭ ٸشٸندە ٸشكٸ ٸستەر ورگاندارىنىڭ 500 قىزمەتكەرٸ, ۇلتتىق ۇلاننىڭ 94 ەسكەري قىزمەتشٸسٸ, قورعانىس مينيسترلٸگٸنٸڭ 80 قىزمەتكەرٸ بار.
«پروكۋراتۋرا جانىنان قۇرىلعان موبيلدٸك توپتار قالا اۋماعىندا تٶتەنشە جاعداي رەجيمٸن بۇزۋ فاكتٸلەرٸن انىقتايتىن بولادى. وسىعان قاراي, حالىقتىڭ دەنساۋلىعى مەن قاۋٸپسٸزدٸگٸن قامتاماسىز ەتۋ ٷشٸن تۇرعىنداردى كارانتيننٸڭ بارلىق تالابىن ساقتاۋعا شاقىرامىز» - دەدٸ اتىراۋ قالاسىنىڭ پروكۋرورى ارشات تايتۋللين.
اتىراۋ قالاسىنىڭ 4 باعىتىنا قويىلعان بلوك-بەكەتتە ٸشكٸ ٸستەر ورگاندارىنان – 48, قورعانىس مينيسترلٸگٸنەن 56 قىزمەتكەر كەزەكشٸلٸك اتقارۋدا. ولارعا 12 ارنايى اۆتوكٶلٸك بٶلٸنگەن.
