قازاقستاندا ەسكەري قىزمەتشٸلەردٸڭ 70 پايىزدان استامى كەلٸسٸمشارت بويىنشا قىزمەت ەتەدٸ, دەپ حابارلايدى قازاقپارات.
الماتىدا ونلاين بريفينگ بارىسىندا الماتى قالاسى قورعانىس ٸستەرٸ جٶنٸندەگٸ دەپارتامەنتٸنٸڭ باسشىسى امانتاي ٶسەرباەۆ وسىلاي دەپ مەلٸمدەدٸ.
«بٷگٸندە كەلٸسٸمشارت بويىنشا قىزمەت ەتكٸسٸ كەلەتٸندەر سانى ارتىپ كەلەدٸ. مىسالى, بيىل كەلٸسٸمشارتپەن جۇمىس ٸستەۋگە الماتىدان 500-گە جۋىق ادام قابىلداندى», - دەدٸ ول.
سونىمەن قاتار, ەسكەرگە شاقىرىلعاندار اراسىندا كٶرۋ قابٸلەتٸ ناشار ازاماتتار كٶبەيگەن.
«جاڭا بۋىنداعى ەسكەرگە شاقىرىلۋشىلار اراسىندا جيٸ كەزدەسەتٸن اۋرۋلاردىڭ بٸرٸ – كٶرۋ قابٸلەتٸنٸڭ ناشارلىعى, سوندىقتان تالاپتار ٶزگەرٸپ, تٶمەندەتٸلدٸ. سەبەبٸ, قازٸر 100 % كٶرۋ قابٸلەتٸ بار ەسكەرگە شاقىرىلۋشىلار از. بٸز سونداي-اق ٷمٸتكەرلەردٸڭ بٸلٸم دەڭگەيٸ مەن پسيحولوگييالىق جاعدايىن ەسكەرەمٸز», - دەدٸ ٶسەرباەۆ.
بريفينگ بارىسىندا قورعانىس ٸستەرٸ جٶنٸندەگٸ دەپارتامەنت باسشىسى ەسكەرگە شاقىرۋدى كەيٸنگە قالدىرۋ نەمەسە بوساتۋ تۋرالى شەشٸمدٸ تەك شاقىرۋ كوميسسيياسى قابىلدايتىنىن ايتتى.
