اقتٶبەدە بٸر اپتادا «قىزىل» مەرتەبەسٸ بار ەكٸ, «سارى» مەرتەبەسٸ بار 9 ادامنىڭ كٶپشٸلٸك ورىنعا بارعانى انىقتالدى. بٸر ادامعا ايىپپۇل سالىندى, دەپ حابارلايدى "ۇلت اقپارات".
اقتٶبە وبلىسى بويىنشا 623 نىساندا «Ashyq» قوسىمشاسى قولدانىلادى. قازٸرگٸ كەزدە جەكە جاعاجاي يەلەرٸ ٶتٸنٸش بەرٸپ جاتىر.
«ٶڭٸردە كارانتين شەكتەۋٸ كٷشەيٸپ, جاعاجاي يەلەرٸ «Ashyq» جوباسىنا ٶتٸنٸش بەرٸپ جاتىر. جالپى جاعاجاي جۇمىسىنا تىيىم سالىنعان. ال قوسىمشا ەنگٸزٸلسە, ەرەجەگە ساي قىزمەت كٶرسەتەدٸ», - دەدٸ وبلىستىق سانيتارييالىق-ەپيدەميولوگييالىق باقىلاۋ دەپارتامەنتٸنٸڭ باسشىسى نۇرسۇلۋ بەركٸمباەۆا.
اقتٶبە وبلىسى بويىنشا 24-30 ماۋسىم ارالىعىندا «قىزىل» مەرتەبەسٸ بار ەكٸ, «سارى» مەرتەبەسٸ بار 9 ادامنىڭ كارانتين تالابىن ساقتاماعانى انىقتالدى. بٸر ادام ەكٸمشٸلٸك جاۋاپقا تارتىلىپ, «سارى» مەرتەبەسٸ بار ادامدارعا باس سانيتار دەرٸگەردٸڭ قاۋلىسى بەرٸلدٸ.
ايتا كەتەيٸك, بٸر تەۋلٸكتە تاعى 63 جاعداي تٸركەلدٸ. قازٸرگٸ كەزدە 173 ادام ينفەكتسييالىق ستاتسيونارلاردا ەم الىپ جاتىر. ونىڭ 129-ى قالادا.
وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى بەكبولات ٸزباساروۆتىڭ ايتۋىنشا, 16 ادام جانساقتاۋ بٶلٸمٸنە تٷسكەن. ونىڭ ٷشەۋٸ ٶكپەنٸ جاساندى جەلدەتۋ اپپاراتىنا قوسىلدى. سونداي-اق 40 بالادان COVID-19 انىقتالىپ, ونىڭ جەتەۋٸ اۋرۋحانادا جاتىر. ۆيرۋس جۇقتىرعان 15 جٷكتٸ كەلٸنشەكتٸڭ التاۋى اۋرۋحانادا.
