فوتو: qamqor.gov.kz
قۇقىقتىق ستاتيستيكا جەنە ارنايى ەسەپكە الۋ ورگاندارى پورتالىندا «الماتىەلەكتروترانس» كومپانيياسىنىڭ بۇرىنعى باسشىسى بەرٸكحان مىرزاكەرٸموۆكە ٸزدەۋ سالىنعانى تۋرالى اقپارات شىقتى, دەپ حابارلايدى Kazinform اگەنتتٸگٸ.
پورتالدا جارييالانعان اقپاراتقا سەيكەس, مىرزاكەرٸموۆ بەرٸكحان قابيۇلىنا ٸزدەۋ جٷرگٸزٸپ جاتقان قۇزىرلى ورگان — قارجى مونيتورينگٸ اگەنتتٸگٸنٸڭ الماتى قالاسى بويىنشا ەكونوميكالىق تەرگەۋ دەپارتامەنتٸ.
اقپاراتتا سونداي-اق مىرزاكەرٸموۆكە 8 كٷننەن بەرٸ ٸزدەۋ جارييالاعانى جازىلعان.
بۇعان دەيٸن Telegram-ارنالاردىڭ بٸرٸندە الماتى قالاسى بويىنشا ەكونوميكالىق تەرگەۋ دەپارتامەنتٸنٸڭ قىزمەتكەرلەرٸ قر قك 189-بابى بويىنشا «الماتىەلەكتروترانس» جشس بۇرىنعى باس ديرەكتورى بەرٸكحان مىرزاقەرٸموۆكە (سەنٸپ تاپسىرىلعان بٶتەن مٷلٸكتٸ يەمدەنۋ نەمەسە ىسىراپ ەتۋ) قىلمىستىق ٸس قوزعاعانى تۋرالى حابارلانعان ەدٸ.
ايتا كەتەيٸك, بەرٸكحان مىرزاكەرٸموۆ 2021 جىلدىڭ اقپان ايىندا «الماتىەلەكتروترانس» جشس-عا باسشى بولىپ كەلگەن بولاتىن.
سونىمەن قاتار 2022 جىلى قازان ايىندا «الماتىەلەكتروترانس» ەكس-باس ديرەكتورى بەكمىرزا يگەنبەردينوۆ 150 مىڭ دوللار كٶلەمٸندە پارا الىپ جاتقان سەتٸندە ۇستالعانىن حابارلاعانبىز.
