رەسپۋبليكالىق جەدەل-قۇتقارۋ جاساعىنىڭ قۇتقارۋشىلارى مىڭجىلقى تاۋىنان ەكٸ تۋريستٸ تٷسٸردٸ, دەپ حابارلايدى "ۇلت اقپارات".
2 ماۋسىم كٷنٸ رەسپۋبليكالىق جەدەل-قۇتقارۋ جاساعىنىڭ كەزەكشٸ پۋلتٸنە مىڭجىلقى تاۋىندا قيىن جاعدايدا قالعان ادامدار تۋرالى اقپارات تٷستٸ. بەلگٸلٸ بولعانىنداي, تۋريستەر باستيونعا قاراما-قارسى جارتاسقا كٶتەرٸلٸپ ٶزدٸگٸنەن تٶمەن تٷسە الماي قالعان.
«وقيعا ورنىنا جەدەل قۇتقارۋ توبى اتتاندى. رەسپۋبليكالىق جەدەل-قۇتقارۋ جاساعىنىڭ ماماندارى شاپشاڭدىعى مەن كەcٸبي شەبەرلٸگٸنٸڭ ارقاسىندا زارداپ شەككەندەردٸ تەز ارادا ٸزدەپ تاپتى. ولار 50 گرادۋس ەڭٸستەگٸ جارتاستا شامامەن 3500 مەتر بيٸكتٸكتە بولعان. سونداي-اق, وقيعا ورنىنا الماتى قالاسىنىڭ قۇتقارۋ قىزمەتٸنٸڭ قىزمەتكەرلەرٸ دە كەلدٸ»,- دەپ حابارلادى رەسپۋبليكالىق جەدەل-قۇتقارۋ جاساعىنىڭ باسپاسٶز قىزمەتٸ.
ول جاققا جەتۋ وڭاي بولمادى. جارتاستاردان سۋ اعىپ, ٷلكەن تاستار تٶمەنگە قاراي دومالادى. سونداي-اق كەي جەرلەردە قار مەن مۇز جاتتى.
«تٶتەنشە جاعداي قىزمەتٸنٸڭ قۇتقارۋشىلارى الپينيستٸك تەحنيكانى قولدانىپ, بارلىق كەدەرگٸلەردٸ ەڭسەرە وتىرىپ, جاستاردى تٶمەن تٷسٸردٸ»,- دەپ اتاپ ٶتتٸ ۆەدومستۆادان.
قۇتقارىلعان قىز بەن جٸگٸت شىعىس قازاقستان وبلىسىنان. ەكەۋٸ دە قاتتى شارشاعان ەرٸ كيٸمدەرٸ دە مۇنداي باعىتقا ارنالماعان.
