Respýblikalyq jedel-qutqarý jasaǵynyń qutqarýshylary Myńjylqy taýynan eki týristi túsirdi, dep habarlaidy "Ult aqparat".
2 maýsym kúni respýblikalyq jedel-qutqarý jasaǵynyń kezekshi pýltine Myńjylqy taýynda qiyn jaǵdaida qalǵan adamdar týraly aqparat tústi. Belgili bolǵanyndai, týrister Bastionǵa qarama-qarsy jartasqa kóterilip ózdiginen tómen túse almai qalǵan.
«Oqiǵa ornyna jedel qutqarý toby attandy. Respýblikalyq jedel-qutqarý jasaǵynyń mamandary shapshańdyǵy men kácibi sheberliginiń arqasynda zardap shekkenderdi tez arada izdep tapty. Olar 50 gradýs eńistegi jartasta shamamen 3500 metr biiktikte bolǵan. Sondai-aq, oqiǵa ornyna Almaty qalasynyń qutqarý qyzmetiniń qyzmetkerleri de keldi»,- dep habarlady Respýblikalyq jedel-qutqarý jasaǵynyń baspasóz qyzmeti.
Ol jaqqa jetý ońai bolmady. Jartastardan sý aǵyp, úlken tastar tómenge qarai domalady. Sondai-aq kei jerlerde qar men muz jatty.
«Tótenshe jaǵdai qyzmetiniń qutqarýshylary alpinistik tehnikany qoldanyp, barlyq kedergilerdi eńsere otyryp, jastardy tómen túsirdi»,- dep atap ótti vedomstvadan.
Qutqarylǵan qyz ben jigit Shyǵys Qazaqstan oblysynan. Ekeýi de qatty sharshaǵan ári kiimderi de mundai baǵytqa arnalmaǵan.
