الماتىدا ەلەكتر ەنەرگيياسى قىمباتتادى. بۇل تۋرالى تابيعي مونوپولييالاردى رەتتەۋ كوميتەتٸنٸڭ الماتى قالاسى بويىنشا دەپارتامەنت باسشىسى بولات سەمبەتوۆ بريفينگ بارىسىندا ايتتى, دەپ حابارلايدى "ۇلت اقپارات".
بولات سەمبەتوۆتىڭ ايتۋىنشا, 2020 جىلدىڭ 1 قاڭتارىنان باستاپ ەلەكتر قۋاتىنىڭ تاريفٸ ازداپ كٶتەرٸلدٸ.
«ٶتكەن جىلدىڭ سوڭىندا «الماتىەنەرگوسبىت» جشس باعانى كٶتەرۋ تۋرالى ٶتٸنٸش جاسادى. نەتيجەسٸندە تاريف 4,6% قىمباتتاپ, تۇتىنۋشىلار ەر كيلوۆاتت ٷشٸن ەندٸ بۇرىنعىداي 16 تەڭگە 36 تيىن ەمەس, 17 تەڭگە 12 تيىن تٶلەيدٸ. مۇنداي شەشٸم قابىلداۋعا ەلەكتر قۋاتىن جەتكٸزەتٸن الپاۋىت كومپانييالاردىڭ قىزمەت قۇنىن ٶسٸرۋٸ سەبەپ بولدى. ناقتىراق ايتقاندا, «جاڭارتىلاتىن ەنەرگييا كٶزدەرٸ بويىنشا ەسەپ ايىرىسۋ-قارجى ورتالىعى» جشس ەلەكترمەن جابدىقتاۋ قىزمەتتەرٸنە تاريفتٸ 30%-عا, «KEGOC» جەلٸلەرٸ ارقىلى ەلەكتر ەنەرگيياسىن جەتكٸزۋ بويىنشا قىزمەت 12% -عا, «قتج» اق قىزمەتتەرٸنٸڭ 2%-عا قىمباتتاۋى», – دەپ تٷسٸندٸردٸ بولات سەمبەتوۆ.
ونىڭ ايتۋىنشا, قازٸر قالاداعى سۋىق سۋ تاريفٸ – 42,8 تەڭگە, كەرٸز سۋى – 23, 13 تەڭگە, جىلۋ باعاسى – 3365 تەڭگە, گاز – 26,5 تەڭگە.
«ٶتكەن جىلى تۇرعىندارعا جىلۋ تاريفٸ 18 پايىزعا تٶمەندەدٸ. بيىل جىلۋ تاريفتەرٸ كٶتەرٸلمەيدٸ دەپ ٷمٸتتەنەمٸز, ٶيتكەنٸ بٸز بۇل جەردە تاريفتٸڭ كٶتەرٸلۋٸنە ەشقانداي سەبەپ جوق»,– دەيدٸ ول.
بۇعان دەيٸن, دەپارتامەنت باسشىسى الماتىدا اقپاننان باستاپ سۋدىڭ تاريفٸ 4%-عا ارزانداعانىن ايتقان بولاتىن.
